პრემიერ-მინისტრი, გიორგი გახარიას თქმით, კორონავირუსის პერიოდში ეკონიმიკური სტიმულირებისთვის დაახლოებით მილიარდი ლარის რესურსი მიმართული ან ეკონომიკაში დატოვებულია. ამის შესახებ გახარიამ საგანგებო ბრიფინგზე განაცხადა.

მისივე თქმით, თუ გლობალური მდგომარეობა არ გამოსწორდა, ისინი დამატებით ზომებს მიიღებენ.

ახალი გეგმის ფარგლებში 50 ნომრამდე სასტუმროებისთვის საპროცენტო მომსახურებას სახელმწიფო მოემსახურება. ამასთანავე ინფრასტრუქტურული პროექტებისთვის სახელმწიფო წლის ბოლომდე დამატებით 300 მილიონ ლარს მიმართავს.

მისი თქმით, მიიღეს გადაწყვეტილება, რომ ისეთ დარგებში და ისეთი კომპანიებისთვის, რომლებიც საქმიანობენ სასტუმროებისა და რესტორნების, ტურისტული სააგენტოების, სატრანსპორტო კომპანიების, საექსკურსიო კომპანიებისა და სხვა სფეროებში 4 თვით გადაუვადებენ ქონებისა და საშემოსავლო გადასახადს.

ამავე პროგრამის ფარგლებში, საბანკო სექტორთან ერთად მიიღეს გადაწყვეტილება, რომ ფიზიკური პირები 3 თვის განმავლობაში, აუცილებლობის შემთხვევაში, გათავისუფლებული იქნებიან სასესხო ვალდებულებებისგან.

გახარიამ ისაუბრა იმაზეც, რომ ლარის კურსის ვარდნაზე გავლენა იქონია პანდემიასთან დაკავშირებულმა გამოწვევებმა. მანვე აღნიშნა, რომ ეკონომიკური გუნდი მუშაობს ამ საკითხზე და დარწმუნებული არის, რომ ლარის კურსი შესაბამის საბალანსო ნიშნულს დაუბრუნდება.

11 მარტს ჯანდაცვის მსოფლიო ორგანიზაციამ COVID-19, იგივე კორონავირუსი, რომელმაც გავრცელება 3 თვის წინ დაიწყო, საერთაშორისო პანდემიად გამოაცხადა. საქართველოში კორონავირუსით ინფიცირების 25 შემთხვევაა დადასტურებული.