კორონავირუსის კიდევ უფრო გავრცელების თავიდან ასარიდებლად საქართველოში სხვა ბევრი ქვეყნის მსგავსად სკოლებსა და უნივერსიტეტებში სწავლა დროებით გადაიდო.

სასწავლო დაწესებულებების ნაწილი ონლაინ სწავლებაზე გადავიდა, ნაწილი კი ამ მეთოდს უახლოესი მომავლის ალტერნატივად განიხილავს. ამის ფონზე, წარმოიდგინეთ, როგორ განვითარდებოდა მოვლენები ნოდარ დუმბაძის ყველასათვის საყვარელ ნაწარმოებში მე, ბებია, ილიკო და ილარიონი ახლა რომ დაწერილიყო.

თქვენ თუ გაგიჭირდათ წარმოდგენა, ავთანდილ ვაშაძის ვერსია დაგეხმარებათ, რომელმაც მე, ბებია, ილიკო და ილარიონის ცნობილი სცენა ახლებურად გააცოცხლა და ფეისბუქ გვერდზე ისტორია ფერებით გამოაქვეყნა:

"– ჩიგოგიძე!
– ონლაინ ვარ, მასწავლებელო!
– კალანდაძე!
– აგერ ვანათებ, მასწავლებელო!
– სიხარულიძე!
– ვინდოუსი აქვს გადასაყენებელი, მასწავლებელო და ჭყონიამ, ცენტერაძემ, ბურჭულაძემ, ქორიძემ, ნინიძემ და ღლონტმა თიმ ვიუერი ჩაურთეს.
– მთელი კლასტი ვერ ჩაერთეთ? — იკითხა გულჩვილმა მასწავლებელმა.
– სერვერზე თიმ მემბერისთვის ფრი სფეისი აღარ დარჩა, თორემ ჩავერთვებოდით
– ვაშალომიძე, ვაშალომიძე, ვა-შა-ლო-მი-ძე! — ყვირის მასწავლებელი და მაუსს ხაოზე ურტყამს.
– აქ ვანთივარ, პატივცემულო მასწავლებელო!
– მასეთი ნათება და ოფლაინ ყოფნა ერთი და იგივეა!
– ონლაინ-ოფლაინ, საკითხავი აი ეს არის!"

ამის შემდეგ, ალბათ, არც იმის წარმოდგენა გაგიჭირდებათ, ურჩ ზურიკელას, რომელიც წესებს არა დაგიდევთ, როგორ დასდევს ბებია, რათა თვითიზოლაციის წესები არ დაარღვიოს.