ამ კვირაში ჟურნალისტებს შესაძლებლობა ჰქონდათ ჰარვი ვაიშტაინის სასამართლო საქმის დაულუქავ დოკუმენტებს გასცნობოდნენ, რომელთა შორისაც ვაიშტაინის ელექტრონული ფოსტის პირადი მიმოწერებიც იყო.

"ჯენიფერი ენისტონი უნდა მოკვდეს" — ასე უპასუხა ვაინშტაინმა პირად მიმოწერაში იმ ჟურნალისტს, რომელიც მისგან კომენტარს ელოდა ცოტა ხნის წინ ჯენიფერ ენისტონის სექსუალური შევიწროების შესახებ გავრცელებულ ამბავზე.

ეს წერილი 2017 წლის 31 ოქტომბრითაა დათარიღებული — ცოტა ხნით ადრე უცხოურ მედიაში გავრცელდა ვარაუდი, რომ ვაიშტაინის მსხვერპლებს შორის ჯენიფერ ენისტინიც იყო. 2017 წელს ამ გავლენიანი ჰოლივუდელი პროდიუსერის სექსუალურ შევიწროებაში და გაუპატიურებაში არაერთი ქალის მიერ საჯაროდ დადანაშაულების შემდეგ, ვაინშტაინმა კრიზისის მართვის ექსპერტი დაიქირავა, რომელმაც აცნობა, რომ ამერიკული ტაბლოიდი National Enquirer ჯენიფერ ენისტონის შესახებ სტატიის გამოქვეყნებას გეგმავდა.

სექსუალური შევიწროების ეს ფაქტი თავად ჯენიფერ ენისტონის წარმომადგენელმა უარყო, თუმცა, როგორც ჩანს, ამან ვაინშტაინი თავის დროზე მაინც გააღიზიანა.

როგორც New York Times წერს, 1000 გვერდზე მეტი ოდენობის დოკუმენტებში ასევე გვხვდება ვაიშტაინის პირადი წერილები ცნობილ მილიარდერებთან, მაიკლ ბლუმბერგთან და ჯეფ ბეზოსთან, რომლებსაც ის დახმარებას სთხოვდა:

"კომპანიიდან ჩემს დათხოვნაზე ფიქრობენ. მხოლოდ იმას გთხოვთ, მცირე შესვენების დრო მომცეთ, რათა საკუთარი თავის ხელახლა გაცოცხლება შევძლო და მეორე შანსი მივიღო", — წერია ერთ-ერთ წერილში.

ფოტო: Sarah Blesener / The New York Times

როგორც უკვე ვიცით, ეს ცნობილი ამერიკელი კინოპროდიუსერი ნაფიცმსაჯულთა სასამართლომ გაუპატიურებას და სექსუალურ ძალადობაში დამნაშავედ ცნო — განახლებული ინფორმაციით, მას 29 წლამდე პატიმრობა ემუქრება.

ჰარვი ვაინშტაინის წინააღმდეგ გამოძიება მას შემდეგ დაიწყო, რაც 2017 წლის ბოლო ის არაერთმა ქალმა სექსუალურ შევიწროებაში დაადანაშაულა, რამაც #MeToo მოძრაობას საფუძველი ჩაუყარა. ათობით ქალმა ჰარვი ვაინშტაინი სექსუალურ შევიწროებაში, თავდასხმასა და გაუპატიურებაში დაადანაშაულა.