ზვარეში საპროტესტო აქცია მესამე დღეა გრძელდება. ჩინურ კომპანიაში დასაქმებულთა მოთხოვნები უცვლელი რჩება, ისინი მენეჯმენტის ცვლილებასთან ერთად, გაცდენილი საათების ანაზღაურებასაც ითხოვენ.

პროტესტის გამო, შეწყვეტილია ხაშური-მოლითის ახალი რკინიგზის მშენებლობაც. როგორც რკინიგზელთა ახალი პროფკავშირის აპარატის უფროსი, პაატა ნინუა ამბობს, კომპანიის იმ 3 თანამშრომლის გარდა, რომლებიც უკვე დააკავეს, მუშების ცემაში სხვებიც იღებდნენ მონაწილეობას:

"მოვითხოვთ მენეჯმენტის გადადგომას, რომელიც ხელმძღვანელობდა ამ ადამიანების ცემას და უშუალოდ მენეჯერები მონაწილეობდნენ ცემის ფაქტში. მოვითხოვთ ყველას პასუხისგებაში მიცემას".

რკინიგზელთა ახალი პროფკავშირის ინფორმაციით, 3 ნოემბერს ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. დღის ბოლოს, სხეულის განზრახ ნაკლებად მძიმე დაზიანების ბრალდებით, სამი თავდამსხმელი მოქალაქე დააკავეს.