საქართველოს პრეზიდენტი სალომე ზურაბიშვილი აცხადებს, რომ ძალადობა მიუღებელია და "ყველა ახლავე უნდა გავერთიანდეთ ამ პრობლემის ირგვლივ". მისი თქმით, ხაშურში მომხდარ ძალადობაზე ინფორმაცია ძალადობის საკითხებზე მომუშავე უწყებებისა და არასამთავრობოების წარმომადგენლებთან შეხვედრამდე გაიგო.

დღეს, 5 მარტს ხაშურში ქალი ყოფილმა ქმარმა დაჭრა. შემთხვევა ქუჩაში, გამვლელების თანდასწრებით მოხდა. შინაგან საქმეთა სამინისტროს ინფორმაციით, 27 წლის კაცმა 25 წლის ყოფილ ცოლს დანით ჭრილობები გულმკერდისა და მუცლის არეში მიაყენა.

4 მარტს, პარლამენტში ყოველწლიური მოხსენების წარდგენისას ზურაბიშვილმა განაცხადა, რომ ქვეყანაში ქალთა მიმართ ძალადობას "გასაქანი მისცა" კულტურასთან ერთგვარმა გაუცხოებამ. მისი აზრით, ეს ჩვენი კულტურისთვის "სრულიად უჩვეულო მოვლენაა".