საქართველოს ჟურნალისტური ეთიკის ქარტია მიიჩნევს, რომ აჭარის ტელევიზიაში მიმდინარე პროცესები საერთაშორისო ორგანიზაციების ყურადღების მიღმა არ უნდა დარჩეს. ამის შესახებ ქარტიამ განცხადება დღეს, 5 მარტს გაავრცელა და ორგანიზაციებს მოუწოდა, რომ დაინტერესდნენ მიმდინარე მოვლენებით.

"ჟურნალისტური ეთიკის ქარტია მიიჩნევს, რომ აჭარის ტელევიზიაში მიმდინარე პროცესები უკიდურესად შემაშფოთებელია და მენეჯმენტის მიერ მიღებული საკადრო გადაწყვეტილებები მიმართულია არხის სარედაქციო პოლიტიკის შეცვლისკენ", — წერია განცხადებაში.

ეთიკის ქარტიამ, ასევე, მოუწოდა აჭარის ტელევიზიის მენეჯმენტს განმარტონ განხორციელებული ცვლილებების საჭიროებები და დაასაბუთონ მიღებული გადაწყვეტილებები. განცხადებაში აღნიშნულია, რომ 4 მარტს, საინფორმაციო სამსახურის უფროსის მოვალეობის შემსრულებლად გიორგი აბაზაძის დანიშვნა ადასტურებს სარედაქციო პოლიტიკის შეცვლის მცდელობას.

"მიგვაჩნია, რომ საინფორმაციო სამსახურის უფროსის მოვალეობის შემსრულებლის დანიშვნა, ისევე როგორც სხვა საკადრო ცვლილებები გაუმჭირვალეა. უცნობია, რომელი კრიტერიუმებით და რა გამოცდილების გამო შეირჩა გიორგი აბაზაძე ამ პოზიციაზე", — წერია განცხადებაში.

აჭარის ტელევიზიის ჟურნალისტები მიიჩნევენ, რომ პროცესი უკეთესობისკენ არ იცვლება და ესკალაციისკენ მიდის. ისინი თვლიან, რომ დირექტორს სურვილი აქვს რედაქცია შეცვალოს. ახალი ამბების გუნდი დირექტორს, აღნიშნულ თანამდებობაზე, ლაშა ზარგინავას ან ირინა ყურუას კანდიდატურას სთავაზობდა, თუმცა მათი გადაწყვეტილება არ გაითვალისწინეს.

ეთიკის ქარტია შეშფოთებას გამოთქვამს, რომ აჭარის მაუწყებლის საინფორმაციო სამსახურის უფროსის მოვალეობის შემსრულებელი სოციალურ ქსელებში ჰომოფობიური და სექსისტური შინაარსის გზავნილებით გამოირჩევა.

28 თებერვლას, გიორგი კოხრეიძემ სამსახურიდან გაათავისუფლა საზოგადოებრივი მაუწყებლის აჭარის ტელევიზიისა და რადიოს საინფორმაციო სამსახურის უფროსი, შორენა ღლონტი.

ამ ყველაფერს წინ უსწრებდა ქართული ოცნებისგან დაკომპლექტებული მრჩევლებისგან არჩეული გიორგი კოხრეიძის მიერ დაწყებული რეორგანიზაცია. მან უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. გარდა ამისა, აღარ გაუგრძელა საინფორმაციო სამსახურის ერთ პროდიუსერს კონტრაქტი, ხოლო მეორეს — მთავარი გამოშვების პროდიუსერს, თანამდებობა გაუუქმა.

ამავე თემაზე: