დღეს, 3 მარტს სმენის მსოფლიო დღე აღინიშნება და ამ დღესთან დაკავშირებით სმენადაქვეითებული ბავშვების მშობლებმა პრესკონფერენცია გამართეს. როგორც ისინი ამბობენ, სახელმწიფოს არ აქვს სმენადაქვეითებულთა მიმართებით სისტემური პოლიტიკა არ გააჩნია. მშობლები მოუწოდებენ სახელმწიფოს, რომ სმენაზე ზრუნვის ეროვნული პროგრამა შეიმუშავონ.

მათივე თქმით, საჭიროა, რომ მარტის თვე სმენის თვედ გამოცხადდეს, რაც სმენის დაზიანებისა და სმენაზე ზრუნვის შესახებ საზოგადოების ინფორმირებას ხელს შეუწყობს და გააძლიერებს.

"ჩვენ ზუსტად ამ მესიჯს ვუგზავნით სახელმწიფოს, რომ არ უნდა იყოს ფრაგმენტული მოქმედებები პრობლემებზე, არამედ წინასწარ უნდა მოხდეს დაგეგმვა, პრობლემის დანახვა, ეროვნული პოლიტიკის, გეგმის შემუშავება. გამოწვევა ზუსტად ეს არის. არსებობს გარკვეული პროგრამები, მაგრამ ეს არ არის სისტემური", — აცხადებენ მშობლები.

როგორც სმენადაქვეითებულ ბავშვთა მშობლები ამბობენ, სმენის პრობლემების მქონე ადამიანებისთვის ადაპტირებული გარემო არ არის.

"ადაპტირებული გარემოა მაგალითად, სუბტიტრები, რომელიც, სამწუხაროდ არ გვაქვს ჯერ, მათ შორის არც საზოგადოებრივ არხზე და არცერთ ტელევიზიაზე. ასევე, ადაპტირებული გარემოა მეტყველების ტექსტად გადაქცევა, რაც ეხმარება ტექნოლოგიების და არა მარტო ტექნოლოგიების მომხმარებელ ჟესტური ენის მომხმარებელ სმენის დაქვეითების მქონე ადამიანებსაც, რომ ერთი მხრივ, უკეთ გაიგონ და მეორე მხრივ, ამ კითხვაში უკეთ განვითარდნენ. რეალურად, აქ პრობლემა არის ინფორმაციის დეფიციტი და გვინდა თუ არ გვინდა, ინფორმაციის დეფიციტი იწვევს გარკვეულ ჩამორჩენას", — აცხადებენ მშობლები.