სომხეთის პრემიერ-მინისტრ ნიკოლ პაშინიანთან შეხვედრის შემდეგ საქართველოს პრემიერ მინისტრმა, გიორგი გახარიამ განაცხადა, რომ მიუხედავად საგარეო ორიანტაციაში განსხვავებული ხედვისა, შეუძლებელია მეზობელ ქვეყნებს შორის გაურკვევლობა იყოს. მისი თქმით, შეთანხმდნენ, რომ ურთიერთობას კეთილმეზობლურ ჭრილში გააგრძელებენ.

"საქართველოს მხარემ ხაზი გაუსვა საკითხს, რომ ჩვენს რეგიონში დემოკრატიზაციის პროცესი კრიტიკულად მნიშვნელოვანია, როგორც ეკონომიკის, ასევე განათლებისა და კულტურის სფეროებში განვითარებისთვის. აღვნიშნეთ, რომ საქართველოს მოქალაქეების გადაწყვეტილება ევროატლანტიკური ინტეგრაციის მიმართულებით არის მათი სურვილი და ქვეყანა ადგას ურყევ გზას", — განაცხადა გახარიამ.

პაშინიანმა კი აღნიშნა, რომ საქართველოსთან ურთიერთობების განვითარება სომხეთის საგარეო პოლიტიკის ერთ-ერთი უმნიშვენლოვანესი საკითხია და რეგიონალური საკითხების მოგვარების ერთადერთი გზა მშვიდობიანი მოლაპარაკებები.

"დარწმუნებული ვარ, რომ ყოველ კონფლიქტს აქვს თავისი თავისებურებები და ამ თვალსაზრისით დიდ მნიშვნელობას ვანიჭებ მგრძნობიარე საკითხებზე დაბალანსებული პოზიციის შენარჩუნებას", — განაცხადა მან.

საქართველოსა და სომხეთის პრემიერების შეხვედრა პირისპირ და გაფართოებულ ფორმატში გაიმართა. მოგვიანებით, ნიკოლ ფაშინიანი, დელეგაციის წევრებთან ერთად გმირთა მოედანზე პატივს მიაგებს საქართველოს ერთიანობისთვის ბრძოლაში დაღუპულ გმირთა ხსოვნას. ის შეხვდება პარლამენტის თავმჯდომარეს და პრეზიდენტსაც.