აჭარის საზოგადოებრივი მაუწყებლის ალტერნატიული პროფკავშირების გაერთიანება საგაფიცვო რეჟიმზე გადავიდა. პროფკავშირების წარმომადგენლება ადმინისტრაციას განცხადება უკვე ჩააბარეს.

"ჩვენ ახლა შევიტანეთ კანცელარიაში განცხადება კოლექტიური დავის თაობაზე. ამ დავის მიზანია, რომ მოლაპარაკება შედგეს დამსაქმებელთან. იმ შემთხვევაში თუ დამსაქმებელთან მოლაპარაკება 21 დღის პერიოდში ვერ შედგება, მაშინ წარმოიშვება გაფიცვის უფლება", — განმარტა მალხაზ რეხვიაშვილმა.

კრიზისზე, რომელიც გაფიცვის შემთხვევაში აჭარის საზოგადოებრივი მაუწყებელში შეიძლება შექმნას, პროფკავშირები პასუხისმგებლობას მრჩეველთა საბჭოსა და დირექტორს, გიორგი კოხრეიძეს აკისრებს. რეგიონულ მაუწყებელში შექმნილი ალტერნატიული პროფკავშირები 80-მდე ჟურნალისტს აერთიანებს.

აჭარის ტელევიზიის ჟურნალისტები ტელევიზიაში მიმდინარე მოვლენებს და რეორგანიზაციას აპროტესტებენ. მათ 28 თებერვალს პირდაპირ ეთერში წუთიერი დუმილით კიდევ ერთხელ გამოუცხადეს პროტესტი ტელევიზიის დირექტორს გიორგი კოხრეიძეს. 28 თებერვალს გიორგი კოხრეიძემ სამსახურიდან გაათავისუფლა საზოგადოებრივი მაუწყებლის აჭარის ტელევიზიისა და რადიოს საინფორმაციო სამსახურის უფროსი, შორენა ღლონტი. მრჩეველთა საბჭომ სამსახურის უფროსების მოადგილეების თანამდებობები გააუქმა.

აჭარის მაუწყებლის დირექტორის გადაწყვეტილებას აკრიტიკებენ არასამთავრობო ორგანიზაციებით, რომლებიც აჭარის მაუწყებლის დირექტორსა და მრჩეველთა საბჭოს მოუწოდებს, რომ მენეჯმენტის მიმართ კრიტიკულად განწყობილი თანამშრომლების დევნა შეწყვიტონ.

გაიგეთ მეტი: