კორონავირუსის საფრთხის მიზეზით დე ფაქტო ხელისუფლება ოკუპირებული რეგიონის ყველა შესასვლელს კეტავს. მათი განცხადებით, ეს ზომები იქამდე გაგრძელდება, სანამ ანატოლი ბიბილოვი სპეციალურ ბრძანებას არ გამოსცემს.

როგორც დე ფაქტო ხელისუფლების გამოცემა რესი წერს, პასუხისმგებელმა უწყებებმა უნდა შეიმუშავონ პრევენციული ზომები რუსეთის ფედერაციის შესაბამის ორგანოებთან თანამშრომლობით.

7 აპრილამდე ე.წ. საზღვრები ჩაკეტა ოკუპირებული აფხაზეთის დე ფაქტო ხელისუფლებამაც.

საოკუპაციო რეჟიმს ე.წ. შესასვლელები მას შემდეგ ჰქონდა ჩაკეტილი, რაც ცენტრალურმა ხელისუფლებამ წნელისში საგუშაგოს მშენებლობა დაიწყო. ხუთთვიანი იზოლაციის შემდეგ, მათ მხოლოდ ოკუპირებული ახალგორის მოსახლეობას მისცეს ე.წ. რაზდახანის გამშვები პუნქტიდან გასვლისა და პენსიის აღების უფლება. ცენტრალური ხელისუფლების მიერ კონტროლირებად ტერიტორიაზე გადმოსლვა მათ ორ თვეში ერთხელ შეეძლოთ, თუმცა ახლა ესეც შეეზღუდათ.

26 თებერვალს საქართველოში ახალი კორონავირუსით ინფიცირების პირველი შემთხვევა დაფიქსირდა. ვირუსი დაუდგინდა საქართველოს მოქალაქეს, რომელიც აზერბაიჯანის გავლით ირანიდან საქართველოში შემოვიდა. მინისტრის თქმით, ის საბაჟოდან პირდაპირ ინფექციურ საავადმყოფოში გადაიყვანეს და სხვა ადამიანებთან შეხება არ ჰქონია. მისივე თქმით, მებაჟეები, რომლებმაც ის შეამოწმეს, პრევენციისთვის, კარანტინში მოთავსდებიან.

გაიგეთ მეტი კორონავირუსის პრევენციის შესახებ: