რკინიგზელთა ახალი პროფკავშირის ინფორმაციით, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. მათი ცნობით, ჰოსპიტალიზირებულია 5 მუშა და 2 ადგილობრივი მაცხოვრებელი. ამის შესახებ დღეს, 3 ნოემბერს, პროფკავშირმა განცხადება გაავრცელა.

რკინიგზელთა ახალი პროფკავშირის მტკიცებით, გუშინ, გვიან ღამით, ჩინეთის რკინიგზის 23-ე ბიუროს ზვარეს ობიექტის ადმინისტრაცია, ტყიდან გამოსულ ორი ადგილობრივი მაცხოვრებელს არმატურებისა და სხვა რკინის კონსტრუქციების გამოყენებით სასტიკად გაუსწორდა:

"ენის ბარიერისა და კომუნიკაციის არ არსებობის გამო, ჩინური კომპანიის წარმომადგენლებმა ჩათვალეს, რომ გლეხებს ჩინეთის რკინიგზის 23-ე ბიუროს კუთვნილი შეშა მიჰქონდათ სახლში. ინციდენტს ადგილზე შეესწრო ზვარეს ობიექტზე დასაქმებული სამი მუშა, რომლებმაც სიტუაციის განმუხტვა სცადეს, თუმცა კომპანიის ათობით წარმომადგენლებმა არც ადგილობრივი დასაქმებულები დაინდეს და უმოწყალოდ სცემეს".

პროფკავშირი ასევე აცხადებს, რომ პოლიციის გამოძახების შემდეგ, სიტუაცია მაშინვე განიმუხტა, ხუთი დაზარალებული კი ხარაგაულის საავადმყოფოში გადაიყვანეს:

"დილით, სამუშაო სმენის დაწყებამდე, დასაქმებულები სიტუაციაში გარკვევას ითხოვდნენ, როცა მათ კომპანიის წარმომადგენლებმა ალყა შემოარტყეს და სხვადასხვა რკინის კონსტრუქციების გამოყენებით, დასაქმებულებს ფიზიკურად გაუსწორდნენ. მუშებმა თავს გაქცევით უშველეს. დასაქმებულების მხრიდან, დილის ინციდენტში დაშავდა კიდევ ორი მუშა, რომლებიც ასევე გადაყვანილნი არიან საავადმყოფოში".

პროფკავშირის ცნობით, ზვარეში, სარკინიგზო ობიექტის მშენებლობა შეჩერებულია.

ერთ-ერთი დასაქმებული მინდია ოკრიბელაშვილი On.ge-სთან საუბარში ჰყვება, რომ კომპანიის წარმომადგენლები მას შემდეგ გახდნენ აგრესიულები, რაც მუშები რამდენიმე დღით გაიფიცნენ და პროტესტის შედეგად შრომითი ხელშეკრულება გააფორმეს. მისი თქმით, იგი დღევანდელ ფაქტს შეესწო:

"დღეს, როდესაც სამუშაოდ მივედით, ვიცვლიდით და გამოგვყვანა დამსაქმებელმა გარეთ, ხელში ნაჯახები და დანები ეჭირათ. წუხელ, ადგილობრი მაცხოვრებლები სცემეს და დღესაც ანალოგიურად გააგრძელეს იგივე სიტუაცია. რაღაც აგრესია აქვთ, მას შემდეგ რაც გაფიცულები ვიყავით და შრომითი ხელშეკრულება გაგვიფორმეს".

მისივე თქმით, პოლიცია დღესაც იყო მისული შემთხვევის ადგილზე. მინდია ოკრიბელაშვილი ჰყვება, რომ მან დაინახა როგორ ჩამოართვა პოლიციელმა ერთ-ერთ თავდამსხმელს ხორცის საჩეხი დანა.

შინაგან საქმეთა სამინისტრომ On.ge-ს განუცხადა, რომ აღნიშნულ ფაქტთან დაკავშირებით გამოძიება სისხლის სამართლის კოდექსის 125-ე მუხლით დაიწყო, რაც ცემას გულისხმობს. უწყება დამატებით დეტალებზე არ საუბრობს.

საქართველოს რკინიგზელთა ახალი პროფესიული კავშირი მოითხოვს შინაგან საქმეთა სამინისტროსგან, დაუყოვნებლივ მოახდინოს რეაგირება მომხდარ ფაქტთან დაკავშირებით და უზრუნველყოს ადგილზე დასაქმებული მუშების უსაფრთხოება.

პროფკავშირი მიმართავს შსს-ს დაუყოვნებლივ დააკავონ ზვარეს ობიექტის ადგილობრივი მენეჯმენტი და მიენიჭოს ინციდენტს შესაბამისი კვალიფიკაცია.

საქართველოს რკინიგზელთა ახალი პროფესიული კავშირი მომხდართან დაკავშირებით სრულ პასუხისმგებლობას აკისრებს საქართველოს რკინიგზას:

"საქართველოს რკინიგზა თავის მხრივ გახლავთ ობიექტის მშენებლობის დამკვეთი. მოვითხოვთ დაუყოვნებლივ გაასაჯაროოს შპს. ჩინეთის რკინიგზის 23-ე ბიუროს კომპანიასთან დადებული ხელშეკრულება, რათა საზოგადოებისთვის ცხადი გახდეს როგორ და რა გზით შემოვიდა საქართველოში მსგავსი უპასუხისმგებლო დამსაქმებელთა დაჯგუფება".

პროფკავშირი ასევე მოუწოდებს შრომის, ჯანმრთელობისა და სოციალური დაცვის მინისტრს, პირად კონტროლზე აიყვანოს დაშავებული მუშების ჯანმრთელობის მდგომარეობა, რათა მათ სიცოცხლეს არ შეექმნას საფრთხე.