დაავადებათა კონტროლის ცენტრის ხელმძღვანელის, ამირან გამყრელიძის თქმით, მთელს მსოფლიოში კორონავირუსის გავრცელების რიცხვი მომატებულია და გამონაკლისი არც საქართველოა. მისი თქმით, ინფექციის შემთხვევები ფიქსირდება საქართველოსთან ტერიტორიულად უფრო ახლოს მყოფ ქვეყნებში, ამიტომ ქვეყანაში მზადყოფნის რეჟიმი უფრო მაღალი უნდა იყოს.

გამყრელიძე მოუწოდებს მოსახლეობას, რომ დაიცვან პირადი ჰიგიენა, თავი აარიდონ თავშეყრის ადგილებს და ასეთ ადგილებში მოხვედრის შემთხვევაში პირბადის გამოყენებას ურჩევს. მისივე თქმით, კორონავირუსიც რესპირაციულ ვირუსია და ყველა ის პრევენციული ზომა, რაც გრიპთან დაკავშირებით არსებობს, კორონავირუსთან მიმართებითაც უნდა გატარდეს.

ასევე, დაავადებათა კონტროლის ცენტრის ხელმძღვანელი იმ ქვეყნებსაც ასახელებს, სადაც მოგზაურობისგან მოსახლეობამ თავი უნდა შეიკავოს.

"თუ განსაკუთრებული აუცილებლობა არ არის, თავი ავარიდოთ მოგზაურობას: ჩინეთში, ირანში, სამხრეთ კორეაში, ასევე მაღალ დასენიანებულ ადგილებში. სამწუხაროდ, აქ შევიდა ასევე ძალიან ატრაქტიული ქვეყანა იტალია და მისი ჩრდილოეთი ნაწილი განსაკუთრებით. ხაზს ვუსვამ, რომ აკრძალული ეს არი არის, მაგრამ თუ განსაკუთრებული აუცილებლობა არ არის, თავი შევიკავოთ", — განაცხადა გამყრელიძემ.