გრეტა თუნბერგის დედა, ოპერის მომღერალი მალენა ერნმანი შვილის დეპრესიაზე, კვებით აშლილობასა და აუტიზმზე საუბრობს. ოჯახმა საერთო წიგნი გამოსცა, Thunberg Family (თუნბერგების ოჯახი), რომელშიც შვედი მშობლები სხვადასხვა საკითხს განიხილავენ.

თუნბერგი ახლა 17 წლისაა და ერთ დროს ჩუმი გოგო კლიმატის ცვლილებების ყველაზე ხმამაღალი აქტივისტია.

მალენა ერნმანი იხსენებს, რომ მის 11 წლის შვილმა ამ ასაკში ქცევები შეცვალა:

"ის ნელ-ნელა ქრებოდა უცნაურ სიბნელეში", — ამბობს ის და ყვება, რომ გრეტას სიტუაციის გადალახვაში აქტივიზმი დაეხმარა:

"ის აღარ უკრავდა პიანინოზე, აღარ იცნოდა, აღარ ლაპარაკობდა და აღარ ჭამდა. მისი მენიუ მინიმალური ოდენობის ბრინჯისგან, ავოკადოსგან და მაკარონისგან შედგებოდა".

ორ თვეში 11 წლის გრეტამ წონაში 10 კილოგრამი დაიკლო. მკურნალობის შემდეგ კი სკოლაში დაბრუნდა. გრეტას მამა, მწერალი და მსახიობი სვანტე თუნბერგი წერს, რომ მისი შვილი სკოლაში ბულინგის მსხვერპლი გახდა:

"სკოლაში არ შეეძლოთ მისი გაგება, ჩათვალეს, რომ მისი პრობლემები გრეტას ბრალი იყო".

წონის აღდგენის შემდეგ, გრეტა ფსიქოთერაპევტთან მიიყვანეს. კონსულტაციების შემდეგ მას მაღალფუნქციური აუტიზმის დიაგნოზი დაუსვეს, რომელსაც მამა ასპერგერის სინდრომად აღწერს.

სწორედ ამ პერიოდში აჩვენეს სკოლაში ფილმი ოკეანეების დაბინძურებაზე, რამაც კლიმატის ცვლილებებით გრეტას დაინტერესებაში გადამწყვეტი როლი შეასრულა. წიგნის მიხედვით, წყნარი ოკეანის პლასტმასით დაბინძურებაზე ფილმს მოსწავლეებზე დიდი გავლენა არ ჰქონია და იმ დღეს გრეტამ პირველად იგრძნო, რას ნიშნავდა, როცა პრობლემას ყურადღებას არ აქცევდნენ.

2018 წლის ზაფხულში გრეტამ პირველად გააპროტესტა კლიმატის ცვლილებები და შვედეთის პრემიერმინისტრის ოფისის წინ შინ გაკეთებული პლაკატით გამოჩნდა. მამის თქმით, ის მის სახლში დაბრუნებას ცდილობდა, რადგან იცოდა გრეტას ემოციური მდგომარეობის შესახებ, თუმცა ის უარზე იყო. მამა კი ხედავდა, რომ სხვა თანამოაზრეებთან გატარებულ დროს მასზე დიდი ეფექტი ჰქონდა:

"აქციის მესამე დღეს ერთ-ერთმა გარემოსდამცველმა გრეტას ვეგანური ტაილანდური ნუდლსი შესთავაზა. გრეტამ ჭამა მაშინ დაიწყო, როცა არავინ აქცევდა ყურადღებას, მან კი მთელი ულუფა მიირთვა".

2019 წლის ბოლოს, ჟურნალმა TIME-მა გრეტა თუნბერგი წლის ადამიანად დაასახელა