2019 წლის ბოლოს ცნობილი გახდა, რომ ამერიკელი რეჟისორი, ადამ მაკკეი ნეტფლიქსისთვის ახალ პროექტზე მუშაობდა. სულ ცოტა ხნის წინ კი დადასტურდა, რომ ფილმში მთავარ როლს ჯენიფერ ლოურენსი ასრულებს.

Don’t Look Up — ასე ჰქვია მომავალ კომედიური ჟანრის ფილმს, რომელშიც ჯენიფერ ლოურენსი ასტრონავტის როლს მოირგებს: დედამიწას გიგანტური ასტეროიდი უახლოვდება, ლოურენსის გმირს კი სურს, რომ მთელი პლანეტის მოსახლეობა გააფრთხილოს ამის შესახებ.

ფილმის რეჟისორი, ადამ მაკკეი ისეთი ცნობილი კინოსურათების ავტორია, როგორებიცაა The Big Short და Vice — ორივე ფილმი ოსკარების დაჯილდოებაზე არაერთ ნომინაციაში იყო წარდგენილი. თავისი როლებით ცნობილია ჯენიფერ ლოურენსიც, რომელმაც 2012 წელს Silver Linings Playbook-ში შესრულებული როლისთვის ოსკარიც დაიმსახურა.

Don’t Look Up-ის გადაღებები აპრილში დაიწყება, პრემიერა კი დიდი ალბათობით წლის ბოლომდე შედგება.

აღსანიშნავია, რომ ეს ჯენიფერ ლოურენსის მონაწილეობით ერთადერთი ფილმი არ იქნება, რომელსაც წელს ვიხილავთ: წლის ბოლომდე დაგეგმილია პაოლო სორენტინოს Mob Girl-ისა და A24-ის ჯერჯერობით უცნობი პროექტის პრემიერები, რომლებშიც ჯენიფერ ლოურენსი თამაშობს.

მოკლედ, არც ისე დატვირთული ბოლო წლების შემდეგ, როგორც ჩანს, ოსკაროსანი მსახიობი ერთდროულად რამდენიმე ფილმით ბრუნდება და მის გულშემატკივრებს სანახაობას არ მოაკლებს.