საქართველოს პრეზიდენტ სალომე ზურაბიშვილს თავდაცვისა და უსაფრთხოების საკითხებში ახალი მრჩეველი ჰყავს. ამ თანამდებობაზე გელა ებანოიძე დაინიშნა.

მანამდე ზურაბიშვილის მრჩეველი კა-გე-ბე-ს (სსრკ-ის სახელმწიფო უშიშროების კომიტეტი) ყოფილი ოფიცერი, დიმიტრი ლეჟავა იყო.

გელა ებანოიძე 2019 წლის ოქტომბრიდან თადარიგის ოფიცერია. მანამდე თავდაცვის ძალების გენერალური შტაბში მუშაობდა. იყო საერთაშორისო ურთიერთობებისა და ევროატლანტიკური ინტეგრაციის დეპარტამენტის უფროსი. 2013-2016 წლებში გერმანიასა და შვეიცარიაში თავდაცვის ატაშეს თანამდებობა ეკავა. 2010-2012 წლებში კი თავდაცვის ატაშე იყო პოლონეთში, ბულგარეთსა და რუმინეთში.

მონაწილეობა აქვს მიღებული კოსოვოს, ერაყის და მტკიცე მხარდაჭერის სამშვიდობო მისიებში. მიღებული აქვს ნატოს მედალი, ბუნდესვერის ღირსების მედალი, მედალი "საქართველოს თავდაცვის სამინისტროს სისტემაში უმწიკვლო სამსახურისათვის" (I, II, III ხარისხი). ასევე, მას გადასცეს მედალი "სამშობლოსთვის თავდადებული", "ქაქუცა ჩოლოყაშვილის" მედალი, აშშ-ს ღირსების მედალი და ნატოს მედალი მტკიცე მხარდაჭერის მისიაში.