თანამედროვე ეპოქაში უკვე აღარ გვაოცებს რომელიმე ცნობილი ფილმის რიმექისა თუ გაგრძელების ხილვა — იქნება ეს Mulan, Saw თუ Ghostbusters. თუმცა აქამდე არავის დაუპირებია 80-ანი წლების კლასიკური ტრილოგიის, რობერტ ზემეკისის უკან მომავალში გათანამედროვებული ვერსიით გადაეღო.

და თუ დღეს მაინც გადაიღებდნენ ამ ფილმს, ვის ვიხილავდით ყველასთვის ცნობილი მარტი მაკფლაისა და პროფესორ ემეტ ბრაუნის როლში?

იქნებ, რკინის კაცი და ადამიანი-ობობა?

ფოტო: SONY

რობერტ დაუნ უმცროსი და ტომ ჰოლანდი თანამედროვე კინოში მართლაც ერთ-ერთი ყველაზე საყვარელი პარტნიორი გმირები და მსახიობები არიან.

ფოტო: TODD WILLIAMSON / GETTY IMAGES

კინოსტუდიებმა არა, თუმცა ერთ-ერთმა კინომოყვარულმა, რომელიც კომპიუტერულ ტექნოლოგიებს კარგად ფლობს, ფილმის უკან მომავალში Deepfake ვიდეო გააკეთა და მარტი მაკფლაისა და პროფესორ ემეტ ბრაუნის გმირებს ტომ ჰოლანდისა და რობერტ დაუნ უმცროსის გამოსახულება მისცა.

შედეგი შემზარავად რეალისტურია.

იუთუბზე ვიდეო EZRyderX47-ის სახელით რეგისტრირებულმა მომხმარებელმა 14 თებერვალს ატვირთა და უკვე 4 მილიონამდე ნახვა დააგროვა.

ამ ვიდეოს თამამად შეგვიძლია ვუწოდოთ ციფრული პლასტიკური ქირურგიის შედევრი: შედეგი იმდენად ზუსტია, რომ მოყვარულისთვის რთულია მასში კომპიუტერული კვალის ამოცნობა. Deepfake სწორედ იმითაა გამორჩეული, რომ კომპიუტერული ტექნოლოგიის მიერ შექმნილი ვიდეო რეალურთან მაქსიმალურადაა მიახლოებული.

ამის კიდევ ერთი ცნობილი მაგალითი შარშან გამოქვეყნებული Deepfake ვიდეოა, რომელშიც The Shining-ში ჯეკ ნიკოლსონის ნაცვლად ჯიმ ქერის გამოსახულება ჩასვეს. ვიდეო იმდენად ბუნებრივი ჩანდა, რომ სოციალურ ქსელებში მას ჯიმ ქერის სამსახიობო ოსტატობის დასტურად ავრცელებდნენ.

თანამედროვე ტექნოლოგიების ეს მიღწევები ამჟამად ძირითადად გასართობი ხასიათისაა, თუმცა მომავალში არსებობს საშიშროება, რომ ის ყალბი ამბების, სიძულვილისა და პორნოვიდეობის გასავრცელებლად აქტიურად გამოიყენონ.