არასრულწლოვანი გოგოს "მოტაცების" ბრალდებით შინაგან საქმეთა სამინისტრომ ერთი პირი დააკავა. ინფორმაციას უწყების პრესსამსახური ავრცელებს.

დაკავებული 22 წლამდე კაცია. დანაშაულის დამტკიცების შემთხევაში მას შვიდიდან ათ წლამდე პატიმრობა ემუქრება.

"გამოძიებით დადგინდა, რომ ბრალდებულმა სამ თანამზრახველთან ერთად, მიმდინარე წლის 14 თებერვალს, ქალაქ მარნეულში, ქორწინების მიზნით, თავისუფლება უკანონოდ აღუკვეთა 2002 წელს დაბადებულ ა.ყ.-ს. და შემთხვევის ადგილიდან ავტომობილით წაიყვანა", — აღნიშნულია შსს-ს პრესსამსახურის მიერ გავრცელებულ განცხადებაში.

საქმეზე გამოძიება სისხლის სამართლის კოდექსის 143-ე მუხლის მე-3 ნაწილის "დ" ქვეპუნქტით მიმდინარეობს. ამ მუხლით სისხლისსამართლებრივი პასუხისმგებლობა წინასწარი შეცნობით არასრულწლოვნისთვის თავისუფლების უკანონო აღკვეთისთვის დგება.