ცოცხალმა ლეგენდამ და იდუმალმა ქუჩის ხელოვანმა ბენქსიმ ვალენტინობისთვის ინგლისის ქალაქ ბრისტოლში ახალი ნამუშევარი შექმნა.

ბრისტოლი ბენქსის მშობლიური ქალაქია. შენობაზე მიხატული ბავშვი შურდულით წითელ ყვავილებს ისვრის.

ნამუშევარი შენობაზე დღეებით ადრე შენიშნეს და შენობის მფლობელისთვის და ქუჩაზე მაცხოვრებლებისთვის მშვიდი დილა უეცრად ტურისტების ნაკადმა შეცვალა.

ბენქსიმ საკუთარ ინსტაგრამზე სწორედ ვალენტინობას, რამდენიმე საათის წინ დაგვიდასტურა, რომ ის იდგა სტრიტ არტის უკან.

მანამდე, ბრისტოლში სომალელების საზოგადოების ასოციაციამ დატვიტა:

"დღეს დილით ბარტონ ჰილში ახალგაღვიძებულებს ერთ-ერთ სახლზე ეს შთამბეჭდავი ნახატი დაგვხვდა. იმედი გვაქვს, რომ ეს ბენქსის ნამუშევარია. მოდი და გაგვეცანი. ამ ნახატის ავტორი შემოქმედებითობის გამო აღიარებას იმსახურებს. დიდი მადლობა!"

შენობაში სულ სამი ოჯახი ცხოვრობს. ერთ-ერთი მაცხოვრებელი ქალი ამბობს, რომ თავს ბედნიერად გრძნობს, რადგან ბენქსის ნახატმა და ნამუშევრის ნახვის მსურველებმა ქუჩა დადებითი ემოციებით აავსო:

"მთელი დღეა აღტაცებული ვარ და სახიდან ღიმილი არ მშორდება. ეს ისეთი განსაკუთრებული საჩუქარია. ვიზიტორები ნახატს ბენქსის ვალენტინობის დღეს ეძახიან".