ყოფილი პრეზიდენტის, მიხეილ სააკაშვილის თქმით, პუტინს უფრო ცოტა პოლიტპატიმარი ჰყავს, ვიდრე ბიძინა ივანიშვილს. მთავარ არხთან საუბრისას მან თქვა, რომ გიგი უგულავას დაკავებას არ ელოდა და ვერ წარმოედგინა, რომ "ასეთი სამართლებრივი ნორმების დარღვევით დაიჭერდნენ"

"ეს არის უკიდურესი სისუსტის გამოხატულება, უკიდურესად შეშინებული ადამიანის ქმედებაა. ერთი-ერთზე მახსენებს ასლან აბაშიძის ქმედებებს და ზუსტად ასე ჩამოიშალა ასლან აბაშიძე. ეს არის ივანიშვილის ბოლო აგონია, ტყუილად ჰგონია ვინმეს, რომ რადგან აკეთებს, ძლიერია. უსუსტესია. მინდა გითხრათ, რომ ვლადიმერ პუტინს, იცით ჩემი დამოკიდებულება პუტინის მიმართ, ბევრად ნაკლები პოლიტპატიმარი ჰყავს ამხელა რუსეთში, ვიდრე ივანიშვილს ჰყავს უკვე საქართველოში", — თქვა მიხეილ სააკაშვილმა.

მიხეილ სააკაშვილმა თქვა, რომ გიგი უგულავას ტელეფონით ესაუბრა და მისი თქმით, ის ნამდვილად იმსახურებს პატივისცემას. სააკაშვილის შეფასებით ივანიშვილს სამი დიდი "მარცხი მოუვიდა". პირველი ეს იყო აზრი, რომ პოლიტიკა ახალგაზრდების საქმე არაა და ისინი პოლიტიკოსებს არ უნდა გაეკარონ. მეორე მარცხი იყო, როდესაც ოპოზიცია გაერთიანდა — "მეფე შიშველია". ხოლო სააკაშვილის თქმით, მესამე მარცხი არის ის, რომ მისი "დაჭერების" უკვე აღარავის აღარ ეშინია.

უზენაესმა სასამართლომ 10 თებერვალს გიგი უგულავას პატიმრობა შეუფარდა. ოპოზიციის ლიდერი შინაგან საქმეთა სამინისტროში ცოტა ხნის წინ თვითონ მივიდა. უგულავას თქმით, ციხეში მესამედ მიდის და მიაჩნია, რომ იქ თავისუფლება არ ეზღუდება, პირიქით საქართველოში ციხეა თავისუფლების ადგილი.

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო. უგულავას მიუსაჯეს 1 წლითა და 3 თვით თავისუფლების აღკვეთა, თუმცა სხვა საქმეზე გამოტანილმა განაჩენმა ახალი განაჩენი შთანთქა. მას სასჯელი მოხდილად ჩაეთვალა.

ბრალდების მხარე ამტკიცებდა, რომ თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: "თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად".