შინაგან საქმეთა სამინისტროს ინფორმაციით, თბილისში, პეკინის ქუჩაზე მაღაზია REDBERRY-ის გაქურდვის ფაქტზე 1 პირი დააკავეს, 3 კი იდენტიფიცირებულია.

შინაგან საქმეთა სამინისტროს ინფორმაციით, ბრალდებული 1984 წელს დაბადებულია, რომელიც წარსულში ქურდობისთვისაა ნასამართლევი. მას ბრალად ედება წინასწარი შეთანხმებით ჯგუფის მიერ საცავში ან სადგომში უკანონო შეღწევით ჩადენილი ქურდობა, რამაც დიდი ოდენობით ზიანი გამოიწვია.

უწყების განცხადებით, ბრალდებული 7 თებერვალს, 3 თანამზრახველთან ერთად უკანონოდ შევიდა სამკაულების მაღაზიაში და 10 780 ლარის ღირებულების ვერცხლის სამკაულები წაიღო. სამართალდამცავებმა ბათუმში, დაკავებულის დროებითი საცხოვრებელი სახლის ჩხრეკის შემდეგ, ნაქურდალი სამკაულები ნივთმტკიცებად ამოიღეს.

გამოძიება საქართველოს სისხლის სამართლის კოდექსის 177-ე მუხლის მე-2 ნაწილის "ბ" ქვეპუნქტით, ამავე მუხლის მე-3 ნაწილის "ა" ქვეპუნქტითა და მე-4 ნაწილის "ბ" ქვეპუნქტით მიმდინარეობს. დანაშაული 6-დან 10 წლამდე თავისუფლების აღკვეთას ითვალისწინებს.