ნინო ლომჯარიას განცხადებით, პროკურატურამ აცნობა, რომ მისი პატიმრებთან შეხვედრის შესახებ ინფორმაციის გასაჯაროებაში დანაშაულის ნიშნები ვერ დაინახა. უწყების განცხადებით, სახალხლო დამცველის საქმიანობაში ჩარევისა და ზემოქმედების საქმეზე გამოძება არ დაიწყება.

ნინო ლომჯარია პროკურატურას არ ეთანხმება და გადაწყვეტილება დაუსაბუთებლად მიაჩნია. ის პროკურატურიდან წერილის გამოქვეყნებას აპირებს.

"რათა საზოგადოებისთვისაც იყოს ცნობილი, რა არგუმენტებს მიმართავს პროკურატურა, როდესაც ის უარს აცხადებს გამოძიების დაწყებაზე", — განაცხადა მან.

ლომჯარიას თქმით, საერთაშორისო პარტნიორებისა და ციხეებში ადამიანის უფლებებზე მომუშავე ორგანიზაციების მხარდაჭერის იმედი აქვს.

ლომჯარიამ გამოძების დაწყებისკენ პროკურატურას მას შემდეგ მოუწოდა, რაც პენიტენციურმა სასამხურმა პატიმრებთან შეხვედრის შესახებ ინფორმაცია გაასაჯაროვა. ლომჯარია დარწმუნებულია, რომ მის მიმართ უკანონო თვალთვალში იუსტიციის მინისტრი თეა წულუკიანი იყო ჩართული. მისი თქმით, ოფიციალური განცხადება დაქვემდებარებაში მყოფი უწყებისგან, მინისტრის გარეშე არ გავრცელდებოდა.

პენიტენციურ სამსახურში განაცხადეს, რომ სახალხო დამცველის მიერ გაჟღერებული არცერთი საკანონმდებლო ნორმა არ დარღვევიათ და ციხეში ომბუდსმენის მისვლის საიდუმლოს დაცვის ვალდებულება მათ არ აქვთ.

პენიტენციურმა სამსახურმა განცხადება მას შემდეგ გაავრცელა, რაც პარლამენტში ანგარიშის წარდგენისას ნინო ლომჯარია იუსტიციის მინისტრმა, თეა წულუკიანმა გააკრიტიკა. რამდენიმე დღის წინ ომბუდსმენმა ციხეებში არსებულ მდგომარეობაზე პარლამენტს კრიტიკული ანგარიში წარუდგინა. მაშინ სხდომაზე დამსწრე იუსტიციის მინისტრმა, თეა წულუკიანმა ანგარიშს ნინო ლომჯარიას კრიტიკით უპასუხა და თქვა, რომ ომბუდსმენი პატიმრებს პირადად არ ხვდება. წულუკიანის თქმით, ნინო ლომჯარია საქმიანობის განმავლობაში მხოლოდ მატროსოვის ციხის რამდენიმე ცნობილ პატიმარს შეხვდა.