პარლამენტის ყოფილი თავმჯდომარე და უმრავლესობის წევრი, ირაკლი კობახიძე კითხვაზე, თუ რა გარანტიები მისცა საგარეო საქმეთა მინისტრმა აშშ-ში სენატორებს, ამბობს, რომ პარტნიორებს 2012 წელს დაწყებული პროცესების გაგრძელებას დაპირდნენ. მისი თქმით, 2012 წელს ქვეყნის დემოკრატიაში "გარდატეხა" მოხდა.

"ჩვენ ჩვენს მეგობრებს ვაძლევთ მარტივ დაპირებებს. დაპირება მდგომარეობს იმაში, რომ აუცილებლად გაგრძელდება ის პროცესი, რომელიც 2012 წელს დაიწყო. ეს არის ქვეყნის დემოკრატიზაციის პროცესი, ქვეყნის ეკონომიკური განვითარების პროცესი. 2012 წელს მოხდა დემოკრატიული გარდატეხა, რამაც ჩვენს ქვეყანას განვითარების საშუალება მისცა", — განაცხადა კობახიძემ.

აშშ-ში ვიზიტითმ მყოფმა საგარეო საქმეთა მინისტრმა, დავით ზალკალიანმა აშშ-ში სენატორებთან შეხვედრა გამართა. სენატის საგარეო საქმეთა კომიტეტის თავმჯდომარემ, სენატორმა ჯიმ რიშმა და ევროპისა და რეგიონული უსაფრთხოების თანამშრომლობის ქვეკომიტეტის დემოკრატმა ლიდერმა ჯინ შაჰინმა, საქართველოს საგარეო საქმეთა მინისტრ დავით ზალკალიანთან სენატში შეხვედრის შემდეგ ერთობლივი განცხადება გამოაქვეყნეს.

როგორც სენატორები ამბობენ, ზალკალიანთან შეხვედრისას პრემიერ-მინისტრ გახარიასთვის ცოტა ხნის წინ გაგზავნილი წერილის შემდეგ, გაიმეორეს შეშფოთება საქართველოს დემოკრატიისა და მმართველობის დასუსტების შესახებ.

29 იანვარს სენატორებმა ჯიმ რიშმა და ჯინ შაჰინმა საქართველოს პრემიერ-მინისტრ გიორგი გახარიას წერილით მიმართეს. წერილი საქართველოს დემოკრატიულ უკუსვლაზე, ოპოზიციის ლიდერების სამართლებრივ დევნაზე საუბრობს და საქართველოს მთავრობას მოუწოდებს დაიცვას დემოკრატიული პრინციპები. სენატორები აცხადებდნენ, რომ წინააღმდეგ შემთხვევაში შესაძლებელია, ორი ქვეყნის პარტნიორობის საკითხი გადაიხედოს.