ატლანტიკური საბჭო ლობისტური კომპანია ორიონ სტრატეჯის ხელმძღვანელის, რენდი შენემანის ოფიციალური განცხადებას ავრცელებს, სადაც ნათქვამია, რომ მათ მიერ ნაციონალურ მოძრაობასთან გაფორმებულ ხელშეკრულებაში ბათუ ქუთელია შეცდომითაა ნახსენები.

როგორც განცხადებაში ვკითხულობთ, აღნიშნული შეცდომა მოგვიანებით გასწორდა და ცვლილება უცხო ქვეყნის აგენტის რეგისტრაციის აქტის განყოფილებაში ხელახლა შევიდა.

"ორიონ სტრატეჯიმ დაიქირავა ბათუ ქუთელია, რათა მას უსაფრთხოების, ეკონომიკური, სამხედრო და პოლიტიკური განვითარების კვლევა და შეფასება უზრუნველყო. ელჩი ქუთელია არ მონაწილეობს ჩვენ კონსულტაციების პოლიტიკურ საკითხებში, აშშ-ში ჩვენს საქმიანობასა და ერთიან ნაციონალურ მოძრაობასთან ჩვენს მუშაობაში. ბათუ ქუთელიას სახელი, ადმინისტრაციული შეცდომის გამო მითითებული იყო საკონტაქტო პირად ორიონ სტრატეჯის მიერ აშშ-ის იუსტიციის დეპარტამენტში შეტანილ განცხადებაში. მოგვიანებით, აღნიშნული შეცდომა გასწორებული იქნა და ცვლილება უცხო ქვეყნის აგენტის რეგისტრაციის აქტის განყოფილებაში ხელახლა შევიდა. ორიონ სტრატეჯი სინანულს გამოთქვამს შეცდომის გამო", — ნათქვამია განცხადებაში.

მთავრობასა და ლობისტებზე ინფორმაციის გავრცელების შემდეგ ქართულმა ოცნებამ ერთიანი ნაციონალური მოძრაობის მსგავს კავშირებზე დაიწყო საუბარი. ეს ყველაფერი დროში დაემთხვა ქართული ოცნების ლობისტურ კომპანიასთან ხელშეკრულების განახლებას, რომელიც გუშინ, 2 თებერვალს გასაჯაროვდა.

მმართველი პარტიის ლიდერმა, მამუკა მდინარაძემ დღეს, 3 თებერვალს გამართულ ბრიფინგზე თქვა, რომ ერთიან ნაციონალურ მოძრაობას ლობისტურ კომპანიასთან ბათუ ქუთელია ხელმძღვანელობს. მან ბრიფინგზე შესაბამისი დოკუმენტიც წარმოადგინა. მდინარაძის თქმით, ბათუ ქუთელიას შუამდგომლობა იმის დადასტურებაა, თუ როგორ მივიდა ნაციონალური მოძრაობა "სისტემური დანაშაულიდან" "სისტემურ მანიპულაციამდე".

ნაციონალური მოძრაობა ლობისტებთან კავშირს არ უარყოფს, თუმცა ამბობს, რომ დოკუმენტის ხელმომწერი მათი ხელისუფლების დროს ერთ-ერთი ლიდერი, ბათუ ქუთელია არაა.