პრეზიდენტმა გიორგი მარგველაშვილმა პრემიერთან, პარლამენტის სპიკერსა და ცესკოს თავმჯდომარესთან გამართული კონსულტაციების შემდეგ განაცხადა, რომ წინასაარჩევნო კამპანია 8 ივნისს დაიწყება.

პრეზიდენტის თქმით, რაც უფრო ადრე დაიწყება საარჩევნო კამპანია, სავარაუდოდ, უფრო უკეთესი დასწრება იქნება არჩევნებზე:

"ჩვენ თუ შევხედავთ აქტივობებს, დავინახავთ, რომ ამომრჩეველთა აქტივობა ძალიან დაბალია, ანუ ვერ გადაწყვიტა ამომრჩეველმა რომელ პოლიტიკურ ძალას მისცეს ხმა. ეს ჩემთვის პრობლემაა, რადგან რაც შეიძლება მეტი ამომრჩეველი უნდა მივიდეს. ბუნებრივი ბმა არის ამ საკითხსა და ნაადრევ საარჩევნო კამპანიას შორის."

მისივე თქმით, საპარლამენტო არჩევნების თარიღი უცვლელია და ის 8 ოქტომბერს გაიმართება.

პრეზიდენტის ადმინისტრაციის მხრიდან საარჩევნო პროცედურებთან დაკავშირებულ კონსულტაციებს ესწრებოდნენ პრეზიდენტის ადმინისტრაციის უფროსი გიორგი აბაშიშვილი, უშიშროების საბჭოს მდივანი ირინე იმერლიშვილი და პოლიტიკური მდივანი ფიქრია ჩიხრაძე.