საქართველოში აშშ-ს ახალი ელჩი, კელი დეგნანი უკვე საქართველოშია. მედიასთან მან განაცხადა, რომ მზადაა საელჩოს გუნდთან ერთად და ვაშინგტონის მხარდაჭერით დაეხმაროს საქართველოს თავის ხედვებს მიაღწიოს, რათა იყოს სტაბილური, უსაფრთხო და ეკონომიკური კეთილდღეობის ქვეყანა.

"მოუთმენლად ველი, საქართველოსა და აშშ-ს შორის ძლიერი პარტნიორობის გაგრძელებას, რომელიც საქართველოსა და ამერიკას უკვე თითქმის 30 წელია აკავშირებს. ჩვენ ერთად ვმუშაობთ ეს წლები. ვეხმარებით საქართველოს დემოკრატიული ინსტიტუტების მშენებლობაში, ეკონომიკის გამრავალფეროვნების პროცესში, განათლებისა და ჯანდაცვის სისტემის გაუმჯობესებაში და რა თქმა უნდა, საქართველოს თავდაცვისუნარიანობის გაძლიერებაში, რათა დაიცვას თავისი საზღვრები და მოქალაქეები. ვფიქრობ, საქართველომ დიდებული პროგრესი განიცადა და წინ კიდევ ბევრი რამ არის გასაკეთებელი", — ელჩის სიტყვების თარგმანი ტელეკომპანია იმედმა გაავრცელა.

დეგნანის წინამორბედს, ელჩ იან კელის უფლებამოსილების ვადა 2018 წლის მარტში ამოეწურა, მას შემდეგ, წელიწადზე მეტი აშშ-ს საქართველოში ელჩი არ ჰყავდა და მოვალეობას ელიზაბეთ რუდი ასრულებდა. დეგნანის კანდიდატურა ამერიკის პრეზიდენტმა, დონალდ ტრამპმა კონგრესს 2019 წლის სექტემბერში წარუდგინა. დეკემბერში კი სენატმა ის ელჩად დანიშნა, იანვარში კი მან ელჩის ფიცი დადო.

კელი დეგნანი ევროპასა და აფრიკაში აშშ-ს სამხედრო საზღვაო ძალების სარდლის პოლიტიკური მრჩეველი იყო. მანამდე ის კოსოვოსა და იტალიაში აშშ-ს დიპლომატიური მისიის ხელმძღვანელის მოადგილედ მუშაობდა. ასევე, ნატოში აშშ-ს წარმომადგელობაში იყო პოლიტიკური მრჩეველი და თურქეთში აშშ-ს საელჩოში პოლიტიკური მრჩეველის მოადგილე.

გაიგეთ მეტი: