პარლამენტის დამოუკიდებელი დეპუტატი, თამარ ჩუგოშვილი ამბობს, რომ ამ მოწვევის პარლამენტში თემირლან მაჩალიკაშვილის საქმეზე დროებითი საგამოძიებო კომისიის შექმნას მხარს არ დაუჭერს. TV პირველის ეთერში საუბრისას ჩუგოშვილმა რამდენიმე მიზეზი დაასახელა:

"ეს არის საკითხი, რომელზეც მუშაობის ნაწილი მაინც უნდა იყოს კონფიდენციალური. ეს საქმე მთლიანად ვერ გაიხსნება.

ეს 6 თვე რა პერიოდიც გველის წინ, არის პოლიტიკურად უკიდურესად დაძაბული და პოლარიზებული. შესაბამისად, მე რომ მქონდეს განცდა, რომ კომისიის შემთხვევაში პარტიები, რომლებიც ჩართულები იქნებიან, კეთილსინდისიერად, არა პარტიული მიზნებისთვის გამოიყენებენ ამას, სხვა მიდგომა მექნებოდა.

ამ საქმეზე თუ რაიმე კითხვის ნიშნებია დარჩენილი, არსებობს სტრასბურგის სასამართლო და ის იქნება ინსტიტუცია, რომელიც პასუხს გასცემს. თუ მაინც და მაინც საპარლამენტო კომისიაზეა საუბარი, უფრო უპრიანი იქნებოდა, არჩევნების შემდეგ".

პანკისის სპეცოპერაციის შედეგად მოკლული თემირლან მაჩალიკაშვილის მამა, მალხაზ მაჩალიკაშვილი უკვე წლების ოჯახთან ერთად ითხოვს საპარლამენტო საგამოძიებო კომისიას. იგი აცხადებს, რომ კომისიის მუშაობისას გაირკვევა სიმართლე მისი შვილის მკვლელობის საქმეზე. ამავე მოთხოვნით მაჩალიკაშვილი თბილისსა და რეგიონებში ხელმოწერებსაც აგროვებდა. გასულ წელს პარლამენტის სხდომაზე ნაციონალური მოძრაობის დეპუტატებმა ორჯერ დააყენეს კომისიის შექმნის ინიციატივა, თუმცა ორივეჯერ ჩავარდა. თემირლან მაჩალიკაშვილის საქმის განხილვა ევროპულმა სასამართლომ უკვე დაიწყო.

გუშინ, 28 იანვარს პროკურატურამ თემირლან მაჩალიკაშვილის მიმართ ძალადობით, სამსახურებრივი უფლებამოსილების შესაძლო გადამეტების ფაქტზე გამოძიება შეწყვიტა. პროკურატურის საბოლოო ვერსიით, პანკისის სპეცოპერაციის დროს თემირლან მაჩალიკაშვილი არ დაემორჩილა სპეცრაზმელს, ეჩვენებინა ხელები. უწყება ამტკიცებს, რომ ჩხრეკისას ამოღებულია ხელყუმბარა და ამას ეთანხმება გარდაცვლილის მამა მალხაზ მაჩალიკაშვილიც.

გამოძიების მტკიცებით, ოპერაციაში მონაწილე ყველა პირს ჩატარებული ჰქონდა შესაბამისი ინსტრუქტაჟი, თითოეულ მათგანს გააჩნდა მრავალწლიანი გამოცდილება და გავლილი ჰქონდათ საცეცხლე მომზადების არაერთი კურსი.

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა. რამდენიმე კვირის შემდეგ, 26 დეკემბერს, პანკისში ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო.