ნაციონალური მოძრაობის დეპუტატმა, თინა ბოკუჩავამ პარლამენტის თავმჯდომარესა და ვიცე-სპიკერებთან შეხვედრა სცადა იმის გასარკვევად, თუ რატომ არ შეუშვეს პარლამენტში მალხაზ მაჩალიკაშვილი. ბოკუჩავამ აღნიშნა, რომ სამი სპიკერი ოთახში არ დახვდა, ამიტომ კიდევ ერთ ვიცე-სპიკერ მამუკა მდინარაძეს დაურეკა.

ბოკუჩავამ ტელეფონზე საუბარი მედიის წარმომადგენლებსაც მოასმენინა და ისმოდა, როგორ ჰკითხა მან მდინარაძეს: "4 ვიცე-სპიკერის ოთახთან ჩამოვიარე და არავინ დამხვდა, ჩვენ ვართ ბოიკოტის რეჟიმში, თუ თქვენ?". მდინარაძემ მას უპასუხა, რომ ოთახთან შეხვდებოდა.

იქვე იმყოფებოდა ვიცე-სპიკერი გაგა კახიანი, რომელმაც ბოკუჩავას უთხრა, რომ მისი საქციელი და მსგავსი საუბარი მისაღები არ იყო, რადგან ის პარლამენტში იყო და მაჩალიკაშვილის არშეშვების საკითხს გაარკვევდნენ.

სპეცოპერაციის შედეგად მოკლული თემირლან მაჩალიკაშვილის მამა, მალხაზ მაჩალიკაშვილი დაცვამ პარლამენტში არ შეუშვა, რა დროსაც ის შეუძლოდ გახდა. მაჩალიკაშვილი პარლამენტში შესვლას ბოკუჩავასთან ერთად ცდილობდა, თუმცა დაცვა მხოლოდ დეპუტატის შეშვებას დათანხმდა.

მაჩალიკაშვილი ცდილობდა განემარტა, რომ შესვლის უფლება აქვს, რადგან მასზე საშვია დაშვებული. საუბრისას ის შეუძლოდ გახდა და გონება დაკარგა.

მაჩალიკაშვილი პარლამენტის მიმდებარე ტერიტორიიდან გაიყვანეს და სასწრაფო სამედიცინო დახმარება გამოიძახეს. ტელევიზიის გავრცელებულ კადრებში ჩანს, რომ მაჩალიკაშვილს ცრემლები მოსდის.

მაჩალიკაშვილი და ბოკუჩავა აპირებდნენ ბირფინგის გამართვას, რომ პანკისის სპეცოპერაციის საქმეზე საგამოძიებო კომისიის შექმნა მოეთხოვათ. ეს პირველი შემთხვევა არ არის, როდესაც მაჩალიკაშვილი და ოპოზიცია საგამოძიებო კომისიის შექმნას ითხოვს.

გუშინ, 28 იანვარს პროკურატურამ თემირლან მაჩალიკაშვილის მიმართ ძალადობით, სამსახურებრივი უფლებამოსილების შესაძლო გადამეტების ფაქტზე გამოძიება შეწყვიტა. პროკურატურის საბოლოო ვერსიით, პანკისის სპეცოპერაციის დროს თემირლან მაჩალიკაშვილი არ დაემორჩილა სპეცრაზმელს, ეჩვენებინა ხელები. უწყება ამტკიცებს, რომ ჩხრეკისას ამოღებულია ხელყუმბარა და ამას ეთანხმება გარდაცვლილის მამა მალხაზ მაჩალიკაშვილიც.

გამოძიების მტკიცებით, ოპერაციაში მონაწილე ყველა პირს ჩატარებული ჰქონდა შესაბამისი ინსტრუქტაჟი, თითოეულ მათგანს გააჩნდა მრავალწლიანი გამოცდილება და გავლილი ჰქონდათ საცეცხლე მომზადების არაერთი კურსი.

თემირლან მაჩალიკაშვილის საქმის განხილვა ევროპულმა სასამართლომ უკვე დაიწყო. მაჩალიკაშვილების ოჯახის ინტერესებს ადამიანის უფლებების სწავლების ცენტრი (EMC) და მისი საერთაშორისო პარტნიორი ორგანიზაცია — ადამიანის უფლებათა დაცვის ევროპული ცენტრი (EHRAC) იცავს.

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა. რამდენიმე კვირის შემდეგ, 26 დეკემბერს, პანკისში ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო.