ერთიანი ნაციონალური მოძრაობა ასაჯაროებს ჰელსინკის სენატორის, როჯერ ვიკერის წერილს. მათი თქმით, წერილი სენატორმა გიორგი გახარიას დეკემბრის თვეში გამოუგზავნა. გასაჯაროებულ წერილში სენატორი აღნიშნავს, რომ წარმატებული დემოკრატიული წინსვლასთან დაკავშირებით ბოლოდროინდელ მოვლენებზე შეშფოთებულია.

"გასულ თვეში ქართული ოცნების დეპუტატებმა პარლამენტში ჩააგდეს კრიტიკულად მნიშვნელოვანი დაპირება — 2020 წლის არჩევნებისთვის სრულად პროპორციულ სისტემაზე გადასვლის თაობაზე. ამ საარჩევნო ცვლილებებს ფართო საშინაო მხარდაჭერა აქვს და საერთაშორისო დემოკრატიული საზოგადოება განიხილავს მას მნიშვნელოვან ნაბიჯად საქართველის მრავალპარტიული დემოკრატისათვის. სამწუხაროდ, საკონსტიტუციო ცვლილებების მოულოდნელმა ჩაგდებამ უკვე დაიწყო მომავალი წლის არჩევნების სამართლიანობისადმი საზოგადო ნდობის დაზიანება", — წერია წერილში.

სენატორი აღნიშნავს, რომ ისეთი შთაბეჭდილება რჩება, რომ ბოლოდროინდელი სისხლის სამართლებრივი დევნა მიზანმიმართული იყო პოლიტიკური ოპონენტებისა და ოპოზიციური მედიების წინააღმდეგ.

"ქართული ოცნების თავმჯდომარის, ბიძინა ივანიშვილის ბოლოდროინდელი შენიშვნებმა, რომელიც შეიცავს მუქარას პოლიტიკური ოპონენტების ციხეში ჩასმის შესახებ, გააღრმავა შეშფოთება დევნის და სასამართლო პროცესების დაწყების დროისა და გარემოებების შესახებ. საქმე ეხება ისეთ ოპოზიციონერ პოლიტიკოსებს, როგორებიც არიან ნიკა მელია და გიგა ბოკერია", — წერს როჯერ ვიკერი.

ფოტო: ნაციონალური მოძრაობა

სენატორი ცალმხრივ გადაწყვეტილებად აფასებს უზენაეს სასამართლოში 14 მოსამართლის უვადოდ დანიშვნას და ამბობს, რომ ეს რაოდენობა ბევრად აღემატება ვენეციის კომისიის რეკომენდაციაში მითითებულ სტანდარტს.

"არჩევნების გამო, რომლამდეც 1 წელზე ნაკლები დროა დარჩენილი, მე მოვუწოდებ თქვენს მთავრობას, სწრაფად მიიღოს საარჩევნო სისტემა, რომელსაც ექნება მოქალაქეთა მხარდაჭერა და ყველასთვის უზრუნველყოფს თამაშის თანაბარ წესებს. თუ ეს ზომები მიღებული არ იქნება, კიდევ უფრო შემცირდება შიდა დემოკრატიული ინსტიტუტების მიმართ ნდობა, რამაც შესაძლოა, შეამციროს არჩევნების ლეგიტიმაცია", — ნათქვამია განცხადებაში.

წერილის ბოლოს, სენატორი როჯერ ვიკერი იმედს გამოთქვამს, რომ ამ კავშირებს სერიოზული ყურადღება მიექცევა და ხელისუფლება იქნება გარანტი ქვეყანაში სიტყვის, გამოხატვის, შეკრებისა და მედიის თავისუფლების.

მთავრობისადმი კრიტიკული წერილები, გუშინ 24 იანვარსაც გასაჯაროვდა. ხეილისუფლებას კრიტიკული გზავნილები კიდევ ორმა კონგრესმენმა გამოუგზავნა. კონგრესმენმა ბრაიან ბაბინიმ დაწერა, რომ ქვეყნის ისტორიაში პირველად, საქართველო და ქვეყნისთვის გაწეული რესურსები საფრთხილო და ნეგატიურ კონტექსტში განიხილება. კონგრესმენმა პეტ ოლსონმა კი განაცხადა, რომ კორუმპირებული საქართველოს მთავრობა თავს ესხმის დემოკრატიულ ღირებულებებს.