ყოფილი სახალხო დამცველი და ამჟამად პრემიერის მრჩეველი სოზარ სუბარი მოქმედ სახალხლო დამცველს აკრიტიკებს. ის ამბობს, რომ ნინო ლომჯარიას განცხადება იუსტიციის მინისტრის მიერ სისხლის სამართლის დანაშაულის ჩადენაზე "აბსურდია".

"სახალხო დამცველმა მინიმუმ უნდა დაიცვას, ასეთ დროს მაინც, უდანაშაულობის პრეზუმცია და სანამ დანაშაული არ დადგინდება, ასე არ უნდა უწოდოს. ეს არის აბს. იქ რომ ყოფილიყო მოსმენა, მიყურადება, რა თქმა უნდა, დანაშაული იქნებოდა, მაგრამ არაფერი, აბსოლუტურად. სასჯელაღსრულების დეპარტამენტის თანამშრომლის საქმიანობა არის კანონიერების ფარგლებში", — განაცხადა მან POSTV-ის ეთერში.

სუბარი ამბობს, რომ სახალხო დამცველის ციხეში შესვლა და პატიმრებთან შეხვედრა არ არის კონფიდენციალური ინფორმაცია. მისი თქმით, კონფიდენციალური მხოლოდ პატიმართან საუბრის შინაარსია, თუ ამას თავად დაკავებული ითხოვს.

ის ლომჯარიაზე საუბრისას თავის გამოცდილებას განიხილავს ამტკიცებს, რომ პატიმრებთან შეხვედრებს არ მალავდა. გარდა ამისა, ის რამდენჯერმე ახსენებს ნაციონალური მოძრაობის მმართველობის პერიოდს და დღევანდელს ადარებს.

ის ურჩევს ლომჯარიას, თუ აინტერესებს ვინ გაავრცელა მისი ვიზიტის შესახებ ინფორმაცია, ჟურნალისტებს უნდა ჰკითხოს და არა პენიტენციურ სისტემას.

23 იანვარს პენიტენციურმა სამსახურმა გაავრცელა განცხადება, რომ ნინო ლომჯარია ციხეში ოპოზიციის ლიდერებს ხვდებოდა. მატროსოვის ციხიდან გამოსვლის შემდეგ ომბუდსმენს ჟურნალისტები დახვდნენ, რომლებსაც მან უთხრა, რომ კონფიდენციალურია იმ პატიმართა ვინაობა, ვინც მოინახულა. მანვე აღნიშნა, რომ თეა წულუკიანმა მისი ციხეში შესვლის გასაჯაროვებით კანონი დაარღვია.

24 იანვარს ომბუდსმენმა ნინო ლომჯარიამ განაცხადა, რომ მის მიმართ უკანონო თვალთვალში იუსტიციის მინისტრი თეა წულუკიანი იყო ჩართული. მისი თქმით, ოფიციალური განცხადება დაქვემდებარებაში მყოფი უწყებისგან, მინისტრის გარეშე არ გავრცელდებოდა. სახალხო დამცველის თქმითვე, თუ ეს ინფორმაცია პენიტენციურმა სამსახურმა მინისტრის თანხმობის გარეშე გაავრცელა, მაშინ წულუკიანმა ბოდიში უნდა მოიხადოს და თავად მოითხოვოს პასუხისმგებლობის საკითხის დაყენება.

მან მოუწოდა პროკურატურას, რომ დაიწყოს გამოძიება ომბუდსმენის მიმართ უფლებამოსილების განხორციელების ხელისშეშლისა და ზემოქმედების ფაქტზე.

სპეციალური პენიტენციურ სამსახურში პასუხად განაცხადეს, რომ სახალხო დამცველის მიერ გაჟღერებული არცერთი საკანონმდებლო ნორმა არ დარღვევიათ. ომბუდსმენის პასუხად უწყება განცხადებას ავრცელებს, სადაც, ასევე, ნათქვამია, რომ ციხეში ომბდსმენის მისვლის საიდუმლოს დაცვის ვალდებულება მათ არ აქვთ.

პენიტენციურმა სამსახურმა განცხადება მას შემდეგ გაავრცელა, რაც პარლამენტში ანგარიშის წარდგენისას ნინო ლომჯარია იუსტიციის მინისტრმა, თეა წულუკიანმა გააკრიტიკა. რამდენიმე დღის წინ ომბუდსმენმა ციხეებში არსებულ მდგომარეობაზე პარლამენტს კრიტიკული ანგარიში წარუდგინა. მაშინ სხდომაზე დამსწრე იუსტიციის მინისტრმა, თეა წულუკიანმა ანგარიშს ნინო ლომჯარიას კრიტიკითვე უპასუხა და თქვა, რომ ომბუდსმენი პატიმრებს პირადად არ ხვდება. წულუკიანის თქმით, ნინო ლომჯარია საქმიანობის განმავლობაში მხოლოდ მატროსოვის ციხის რამდენიმე ცნობილ პატიმარს შეხვდა.