Associated Press-ის ინფორმაციით, ირანში ანტისამთავრობო აქციის მონაწილეებს პოლიციამ ცეცხლი გაუხსნა. იმავე ინფორმაციას The Guardian თვითმხილველებზე დაყრდნობით ავრცელებს.

AP ავრცელებს თეირანში გადაღებულ ვიდეოს, სადაც ჩანს, რომ აქციის დაშლისას პროტესტის მონაწილეები გარბიან, ფონად კი სროლის ხმა ისმის. ამავე კადრებში ჩანს რამდენიმე დაშავებული, რომელიც სავარაუდოდ დაჭრილია. მათ აქციის მონაწილეები ეხმარებიან.

ირანში უკვე მესამე დღეა ანტისამთავრობო აქციები იმართება, სადაც ძირითადად სტუდენტები არიან შეკრებილები. ისინი აპროტესტებენ ირანის მიერ უკრაინული ავიახაზების თვითფრინავი ჩამოგდებას და ოთხი დღით დაგვიანებულ აღიარებას. აქციის დაშლა პოლიციამ პირველივე დღეს დაიწყო.

უკრაინული თვითფრინავის ჩამოგდება

8 იანვარს ირანში უკრაინის საერთაშორისო ავიახაზების თვითმფრინავი ჩამოვარდა და ბორტზე მყოფი ყველა პირი, 168 მგზავრი და 9 ეკიპაჟის წევრი, გარდაიცვალა. დაღუპულთა შორის 7 ქვეყნის მოქალაქეები არიან. ირანმა ოთხდიღანი დაგვიანებით აღიარა, რომ თვითმფრინავი მათ "ადამიანური შეცდომით" ჩამოაგდეს, რაც "ამერიკის ავანტიურიზმმა" გამოიწვია. ირანის შეიარაღებული ძალების გენერალური შტაბის განმარტებით, უკრაინული თვითმფრინავი "მგრძნობიარე" და "კრიტიკულ" ვითარებაში გაფრინდა, მაშინ, როდესაც ისინი გენერალ ყასემ სოლეიმანის მკვლელობისთვის შურისსაძიებლად ამერიკულ სამხედრო ბაზებს ბომბავდნენ.

ირანის ამ აღიარებამდე საერთაშორისო მედია წერდა, რომ ირანმა უკრაინული თვითმფრინავი შეცდომით ჩამოაგდო. მალევე გავრცელდა ვიდეომასალაც, სადაც შემთხვევა იყო ასახული.

კომპანიის წარმომადგენლები აცხადებენ, რომ თვითმფრინავი აფრენიდან თითქმის 2 წუთში რადარებიდან გაქრა. მათივე თქმით, მომხდარის გამო გაურკვეველი დროით ირანში ფრენებს შეწყვეტენ.

კომპანიის ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე. მისივე თქმით, ეს ბოინგი ერთ-ერთი საუკეთესო იყო მათ შორის, რაც კომპანიას გააჩნდა.

ირანი უარს ამბობს შავი ყუთი უკრაინას გადასცეს, თუმცა დათანხმდა იმას, რომ გამოძიებაში უკრაინელი ექსპერტებიც ჩაერთონ.

ამავე თემაზე: