არმაზ ახვლედიანი პარტია ქართულ ოცნებას ტოვებს და განმარტავს, რომ პარტიის მმართველი ძალა წლების განმავლობაში ახერხებდა, რომ გაეყალბებინა არჩევნები, სასურველი შედეგი მოეტანა ხელმძღვანელობისთვის, მათთვის ყველაფერზე ეთქვა კი და არასდროს - არა:

"ფასადურობა, მოჩვენებითობა, რომელიც გამეფებულია ქართულ ოცნებაში, ყრილობაზე, ალბათ, უბრალოდ სხვა ხარისხს მიიღებს და ამის შემდეგ პარტია ალბათ ყველა მანქანებით გადაერთვება იმ გზაზე, რომ ნებისმიერი საშუალებით მოიგოს არჩევნები. არჩევნებში გამარჯვება ასეთ პარტიას ნამდვილად არ შეუძლია ნორმალურ, თანაბარ, დემოკრატიულ, კონკურენტულ პირობებში".

ახვლედიანმა დღეს, 10 მაისს გამართულ ბრიფინგზე განმარტა, რომ ქართულმა ოცნებამ უკვე ამოწურა ყველა შესაძლებლობა იმისთვის, რომ გადაქცეულიყო დემოკრატიულ-პოლიტიკურ ორგანიზმად იმისთვის, რომ ხელი შეეწყო საქართველოში პოლიტიკური პროცესის გაჯანსაღებისთვის. მისი თქმით, პარტია აფერხებს პოლიტიკურ განვითარებასა და ქვეყნის დემოკრატიულ წინსვლას:

"ოცნება ასნეულებს ერთიან ქართულ პოლიტიკურ ორგანიზმს. ამიტომაც მე არ შემიძლია ამ პარტიაში დარჩენა, გამოვდივარ პოლიტსაბჭოდან და განვაგრძობ ბრძოლას იმისთვის, რომ თანამოაზრეებთან ერთად, ხელი შევუშალო, წინ აღვუდგე ამ პროცესს".

ახვლედიანის მიერ პარტიის დატოვებას გამოეხმაურა უმრავლესობის ერთ-ერთი წევრი, თამაზ მეჭიაური და განაცხადა, რომ მას არ ეგონა, რომ ახვლედიანი ისევ პოლიტ საბჭოს წევრი იყო:

"ზოგს მეტი ამბიცია აქვს, ზოგის ეს ხედვა საფუძვლიანია, ზოგისთვის უსაფუძვლოა. ამის მიხედვით, ზოგიერთი, რომელსაც ჰგონია, რომ მეტი ეკუთვნის და ვერ იღებს იმდენს ან თვისობრივად სხვა შეხედულებები აქვს პრინციპულ საკითხებზე, ის შეიძლება ბუნებრივად განერიდოს".

"ჩვენ დემოკრატიულ ქვეყანაში ვცხოვრობთ, შესაბამისად არმაზ ახვლედიანს აქვს ნებისმიერი პოლიტიკური გადაწყვეტილების მიღების სრული უფლება" - ასე გამოეხმაურა ფრაქცია ქართული ოცნების თავჯდომარის მოადგილე, ელისო ჩაფიძე ახვლედიანის გადაწყვეტილებას.