ბოსტონელი რეჟისორი ლი ლოკლერი საკუთარ თავს უიმედო რომანტიკოსს უწოდებს და მან ეს უკვე დაამტკიცა, როდესაც შეყვარებულს კინოთეატრში დისნეის ანიმაციის ყურებისას სთხოვა ხელი.

ერთი შეხედვით ბანალურად მოგეჩვენათ? ყველაფერი წინ გაქვთ — მან მძინარე მზეთუნახავის პერსონაჟი საკუთარი შეყვარებულით ჩაანაცვლა.

ჯობს ყველაფერი საკუთარი თვალით ნახოთ:

შეყვარებულის, სტუტი დეივიდისთვის ხელის თხოვნამდე ლოკლერი 6 თვის განმავლობაში ემზადებოდა. მან დასახმარებლად ავსტრალიელ ილუსტრატორს, კაილა კუმბს მიმართა და დისნეის კლასიკურ ანიმაციაში ცვლილებების შეტანაში დახმარება სთხოვა.

იმ სცენიდან, როდესაც ავრორასთან საკოცნელად ბრძოლაგამოვლილი პრინცი ფილიპი შედის, რომლის როლშიც, ცხადია, თავად ლოკლერი წარმოგვიდგა, გოგონა უკვე ხვდება, რომ რაღაც რიგზე არ არის.

ვიდეოში ნახავთ სტუტის გაოცებულ სახეს, როდესაც ქერა ავრორას ნაცვლად თავის მსგავ პრინცესას დაინახავს, მოულოდნელად კი ფილიპი მოიხედავს, რომელიც მის შეყვარებულს ჰგავს. ამის შემდეგ, პრინცი ბეჭდის ყუთს ისვრის, რომელსაც, უკვე არატექნოლოგიური უნარების წყალობით, ლოკლერი იჭერს. ამ დროს ხვდება გოგონა, რომ ყველაფერი მისთვისაა მოწყობილი.

"ყოველდღე არ გაქვს იმის შესაძლებლობა, რომ სკოლის სიყვარულს ხელი სთხოვო", — უთხრა რომანტიკულმა შეყვარებულმა მას და ცალ მუხლზე დაუჩოქა. სტუტმა კი, სანამ დათანხმდებოდა, აუდიტორიას უხერხულად გადახედა, სადაც კიდევ ერთი სიურპრიზი ელოდა — დარბაზი მისი მეგობრებითა და ოჯახის წევრებით იყო სავსე.

"მსოფლიოში ყველაზე ჭკვიანი ადამიანის გაოცებულ სახეზე უკეთესი ერთადერთი რამაა — ის, რომ სამუდამოდ ბედნიერად ვიცხოვრებთ", — დაწერა ლოკლერმა ინსტაგრამზე.

როგორც აღმოჩნდა, რეჟისორს "არას" მიღების შემთხვევაში კიდევ ერთი ანიმაცია ჰქონდა მზად — როგორ ტირის შვიდი ჯუჯა სიმღერა Mad World-ის ფონზე, და იმის მიუხედავად, რომ მისი გამოყენება არ დასჭირვებია, ის დარბაზს მაინც უჩვენა.