როგორც თეთრი სახლის პრესსპიკერი სტეფანი გრიშემი ამბობს, ერაყში ამერიკულ ბაზებზე თავდასხმასთან დაკავშირებით დღეს სპეციალური მიმართვა არ გავრცელდება, პრეზიდენტი დონალდ ტრამპი კი მომხდარის შესახებ ინფორმირებულია.

უცხოური მედიის ინფორმაციით, თეთრი სახლი უკვე დატოვეს ნაციონალური უსაფრთხოების საკითხებში მრჩევლებმა. შეხვედრა 50 წუთის განმავლობაში გრძელდებოდა.

აშშ-ის ავიაციის ფედერალურმა ადმინისტრაციამ ერაყის, ირანის, სპარსეთის ყურისა და ომანის ყურის თავზე არამსახედრო ფრენები შეზღუდა.

ირანმა ერაყში არსებულ მინიმუმ ორ ამერიკულ ბაზას ბალისტიკური რაკეტებით შეუტია. აშშ-ის ცნობით, ამერიკული სამხედრო ბაზების მიმართულებით სულ მცირე 12 რაკეტა ისროლეს თავდასხმა გასულ კვირას ირანელი გენერლის, სოლეიმანის ლიკვიდაციას უკავშირდება. დაშავებულებისა და დაღუპულების შესახებ ინფორმაცია ჯერჯერობით არ გავრცელებულა.

განხორციელებულ თავდასხმაზე პასუხისმგებლობა ირანის რევოლუციის გუშაგთა კორპუსმა აიღო. მათ განცხადებაში ნათქვამია, რომ ნებისმიერი ქვეყანა, სადაც აშშ-ის სამხედრო ბაზებია განლაგებული, შეიძლება აგრესიის სამიზნე გახდეს. გარდა ამისა, გუშაგთა კორპუსმა ამერიკის მოქალაქეებს მოუწოდა, მთავრობას რეგიონიდან სამხედრო ძალების გაყვანა მოსთხოვონ. ირანული სახელისუფლებო მედიის თქმით, ოპერაციას "მოწამე სოლეიმანი" უწოდეს.

გაიგეთ მეტი: