მოძრაობა #შეცვალეს აქტივისტებმა თბილისის მერის მიერ იტალიაში შერჩეულ მილიონიან ნაძვის ხესთან წყალი და სასუქი მიიტანეს. მათი განცხადებით, სურთ ხე ახალ წლამდე მაინც დაემსგავსოს ნაძვს.

"კახი კალაძემ ჩამოიტანა ნახ-ნახევარი ხე. ამიტომ ჩვენ გვინდა, რომ სასუქი დავყაროთ, რომ 31-მდე იქნებ რამენაირად გაიზარდოს", — განაცხადეს მათ.

აქტივისტებს დაცვამ ნაძვის ხესთან მიახლოების უფლება არ მისცა. მათ ტერიტორია ძალის გამოყენებით დაატოვებინეს.

2019 წლის ნაძვის ხე თბილისის მერიამ ტენდერით იყიდა. ტენდერში იტალიურმა კომპანია IDO SRL-მა გაიმარჯვა, ამ კომპანიის წარმოებული სათამაშოებით გაფორმდა თბილისის ქუჩების ნაწილი. ნაძვის ხეს, რომელიც ბიუჯეტს მილიონ ლარამდე უჯდება, ერთწლიანი გარანტია აქვს.