საქართველოში ჩასატარებელ 2021 წლის ევრობასკეტისათვის ახალი სპორტის სასახლე აღარ აშენდება. ამის შესახებ დღეს, 23 დეკემბერს კალათბურთის ფედერაციის პრეზიდენტმა პაატა გურასპაულმა ისაუბრა.

"პირველი, რაზეც ვსაუბრობდით, დიღომში ახალი დარბაზის აშენება იყო, რაც სამწუხაროდ, გამოირიცხა. მეორე, რაზეც ვიფიქრეთ, სპორტის სასახლის განახლება იყო, რაც რიგი მიზეზების გამო შეუძლებელია. საბოლოოდ დაგვრჩა ოლიმპიური სასახლე, რომელსაც გადავაკეთებთ და 10 000 მაყურებელზე მეტს დაიტევს", — პაატა გურასპაული

საქართველომ 2021 წლის ევრობასკეტის ჯგუფური ეტაპის მასპინძლობის უფლება 15 ივლისს, მიუნხენში გამართულ კალათბურთის საერთაშორისო ფედერაციის ევროპის კომიტეტის ასამბლეაზე მიიღო. ეს იმას ნიშნავს, რომ საქართველოს საკალათბურთო ნაკრები ავტომატურად მოიპოვებს ევროპის ჩემპიონატზე ასპარეზობის უფლებას, რომელიც ეროვნული ნაკრებისთვის მეხუთე ევრობასკეტი იქნება.

იმ შემთხვევაში, თუ საქართველო ვერ შეძლებს ფიბას სტანდარტების დარბაზის მომზადებას, მასპინძლობა შესაძლოა ავსტრიას გადაეცეს.