არასამთავრობო ორგანიზაცია სამართლიანი არჩევნების თავმდჯომარე მიხეილ ბენიძე აცხადებს, რომ ქართულ ოცნებასთან დაკავშირებული ფეისბუქგვერდების ამბით გამოძიებაც უნდა დაინტერესდეს. მისი თქმით, ეს საკითხი საარჩევნო კონტრიბუციადაც უნდა განიხილონ.

"ეს არის უკანონო კონტრიბუცია საარჩევნო კამპანიისთვის და ზოგადად პოლიტიკური ფინანსებისთვის, რაც კანონდარღვევააა. ამიტომ ამ მხრივაც საინტერესო არის და მნიშვნელოვანია ამ მიმართულებით რეაგირება", — განაცხადა მან ტელეკომპანია პირველთან ინტერვიუში.

შეგახსენებთ, რომ ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ბენიძე განმარტავს, რომ პროპაგანდაში დახარჯული თანხა გაცილებით დიდ მასშტაბებს შეიძლება აღწევდეს.

"300 000 დოლარზე მეტი, დღევანდელი კურსით თითქმის მილიონ ლარამდე, არის დახარჯული კონკრეტულად ამ ქსელის მიერ. ეს საკმაოდ მასშტაბური თანხაა იმიტომ, რომ ამის მიღმა უნდა გავითვალისწინოთ ხელფასების ხარჯები, ფოტო-ვიდეო მასალების შექმნის ხარჯები და ა.შ. რაც, რა თქმა უნდა, ფეისბუქის რეკლამის თანხაში არ არის შესული. უნდა გავითვალისწინოთ, რომ ეს არ არის ყველა გვერდი. არის სხვა გვერდებიც, რომლებიც, ასევე, აქტიურად ასპონსერებენ პოსტებს", — აცხადებს ის.

ფეისბუქმა თავისი ძირითადი პლატფორმიდან ჯამში 396 გვერდი და ჯგუფი წაშალა. მათ განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღმათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.