გამომძიებელ მარიანა ჩოლოიანს კანონით გათვალისწინებულ ვადებში წაუყენებენ ბრალს. ეს ინფორმაცია On.ge-ს მთავარ პროკურატურაში დაუდასტურეს.

15 წლის მოზარდის გარდაცვალების საქმეზე გუშინ, 17 დეკემბერს გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.