სამოქალაქო აქტივისტებმა და ოპოზიციის წარმომადგენლებმა თბილისის საკრებულოს დეპუტატის, ერეკლე კუხიანიძის ოთახში კარავი გაშალეს. მათი თქმით, არ აპირებენ დატოვოთ საკრებულო მანამ, სანამ ქართული ოცნების დეპუტატი თანამდებობას არ დატოვებს.

"ჩვენ მივეცით დრო, რომ ამ კაცს დაეტოვებინა მანდატი, მაგრამ ეს არ გააკეთა. დამცინავად ბოდიშის მოიხდისო, ვის რა ჩემ ფეხებად უნდა მაგის ბოდიში, გუშინ პირიქით, ქაქუცა ჩოლოყაშვილი მოღალატეაო ამბობდა. ამიტომ, ჩვენ ახლა ვართ მის ყოფილ კაბინეტში, ეს არის თბილისელები, ამას აფინანსებენ თბილისელები და შესაბამისად ეს ოთახი ეკუთვნის თბილისელებს სამოქალაქო აქტივისტები იკავებენ აქაურობას, გაშლიან კარავს", — თქვა ლევან ხაბეიშვილმა მთავარ არხთან საუბრისას.

დაცვის თანამშრომლები ცდილობდნენ აქციის მონაწილეები ოთახიდან გაეყვანათ. მათ შორის რამდენჯერმე მოხდა ფიზიკური და სიტყვიერი დაპირისპირება. აქტივისტებმა ერეკლე კუხიანიძის კაბინეტის კარებს გააკრეს სტიკერები წარწერით "შეცვალე", "ვაჟა ექიმი გმირია".

რამდენიმე დღის წინ თბილისის საკრებულოს ქართული ოცნების წევრმა ერეკლე კუხიანიძემ საოკუპაციო რეჟიმის მიერ უკანონოდ დაკავებული ექიმი ვაჟა გაფრინდაშვილის ოჯახი პროვოკაციაში დაადანაშაულა და აგინა. მსგავსი შინაარსის კრიტიკული პოსტი კუხიანიძემ პირად ფეისბუქგვერდზე მას შემდეგ გამოაქვეყნა, რაც გაფრინდაშვილის ოჯახმა ოცნების ორგანიზებულ ღონისძიებაზე თქვა, რომ ზეიმის დრო არ არის. საკრებულოსთან ერეკლე კუხიანიძის გადადგომის მოთხოვნით აქცია გუშინ, 16 დეკემბერსაც გაიმართა. საკრებულოს თავმჯდომარემ აქტივისტებსა და ოპოზიციის წარმომადგენლებს უთხრა, რომ გუნდი გაივლიდა კონსულტაციებს და გადაწყვეტილებას მეორე დღეს გააცნობდნენ.