პარლამენტის თავმჯდომარე არჩილ თალაკვაძეს სალომე ზურაბიშვილის პრეზიდენტობას სექსისტური კომენტარით აფასებს. მან სირთულეებზე საუბრისას პრეზიდენტის სქესს გაუსვა ხაზი.

"იყო სირთულეები, ვინაიდან პირველად ხდება, რომ საქართველოს ქალი პრეზიდენტი ჰყავს", — თქვა თალაკვაძემ და დასძინა, რომ პრეზიდენტთან დაკავშირებულ "სირთულეებს" ქვეყნის დემოკრატიული სისტემა მოერევა.

"პრეზიდენტთან მიმართებაში პოლიტიკურმა პარტიებმაც, მათ შორის ქართულმა ოცნებამაც აჩვენა, რომ მას აქვს თავისუფალი პოზიციები... გვყავს ქალი პრეზიდენტი, რომელიც არცერთი პოლიტიკური პარტიის წევრი არ არის", — განაცხადა თალაკვაძემ.

ქართული ოცნების მიერ მხარდაჭერილი სალომე ზურაბიშვილი საქართველოს პრეზიდენტად 2018 წელს აირჩიეს და ინაუგურაცია 16 დეკემბერს გაიმართა.

ზურაბიშვილს მისი განცხადებებისა და ქმედებების გამო ხშირად აკრიტიკებენ. ერთ-ერთი ბოლო შემთხვევა ეხებოდა პრეზიდენტის განცხადებას "არც ჯარი გვაქვს და არც გვექნება", რომელიც საზოგადოების ნაწილმა ქართული სამხედრო ძალების დაკნინებად აღიქვა. თვითონ პრეზიდენტი აცხადებს, რომ ეს მხოლოდ რიტორიკა იყო, რომელიც "აქ ნაკლებად ცნობილია".

გარდა ამისა, ნოემბრის ბოლოს, როცა რუსთაველის გამზირზე საპროტესტო აქცია იმართებოდა, პრეზიდენტი სალობიეში იყო. დემონსტრანტების ნაწილი სალობიესთან მივიდა და აქცია იქ განაგრძო.

პრეზიდენტის მიმართ ნეგატიური დამოკიდებულება საზოგადოებრივი აზრის კვლევებში აისახა. NDI-ის სექტემბრის კვლევის მიხედვით, სალომე ზურაბიშვილის საქმიანობას კარგად მოსახლეობის მხოლოდ 12 პროცენტი აფასებს. ამასთანავე, IRI-ს გამოკითხვის შედეგად, პრეზიდენტს მოსახლეობის 70 პროცენტი ნეგატიურად აფასებს.