TV პირველის გადამღები ჯგუფი, ოპერატორი ბექა მარშანიშვილი და ჟურნალისტი სალომე თითმერია პოლიციაში გამოკითხვაზე დაიბარეს. მათთვის შეურაცხყოფის მიყენების საქმეზე ორივე მათგანს ახლა გამომძიებელი ესაუბრება.

არხის გენერალურმა დირექტორმა, ინგა გრიგოლიამ განაცხადა, რომ ბოლო დროს ხელისუფლების წარმომადგენლების მხრიდან აგრესული დამოკიდებულების ფონზე, წარმოუდგენელი არაფერია. მისი თქმით, ყველა დამნაშავეს კანონის ძალით აგებინებენ პასუხს.

"ისეთი განცხადებები კეთდება ამ ბოლო პერიოდში ჟურნალისტების მიმართ, ჩვენი ტელევიზიის მიმართ, სხვების მიმართ... ისეთი დადანაშაულება ხდება ნებისმიერი მწვავე კითხვის გამო, რომ გითხრათ გამიკვირდა — არა... ხელისუფლებას მინდა ვუთხრა, თქვენ ხართ ამ ყველაფერზე, პირველ რიგში, პასუხისმგებელი, ბატონებო და ქალბატონებო. იცით რატო? ჟურნალისტი რომ შეკითხვას დაგისვამთ, ეუბნებით, რომ პოლიტიკურ დაკვეთას ასრულებენ", — თქვა გრიგოლიამ.

დღეს, 14 დეკემბერს ქართული ოცნების ზეიმის დასრულებიდან რამდენიმე წუთში TV პირველის გადამღებ ჯგუფს, ოპერატორ ბექა მარშანიშვილსა და ჟურნალისტ სალომე თითმერიას შეურაცხყოფა მიაყენეს. თითმერია On.ge-სთან საუბრისას ამბობს, რომ კაცი, რომელიც მათ მიმართ აგრესიით გამოირჩეოდა, სხვა მოქალაქეების მიმართ მათმა დასმულმა კითხვამ გააღიზიანა. მისი თქმით, ამ მოქალაქემ TV პირველის ოპერატორს წელში დაარტყა. ოპერატორს დაზიანება აღენიშნება წარბთანაც.