სამოქალაქო მოძრაობა გაბედეს აქტივისტებმა პარლამენტთან საახალწლო ნაძვის ხე მიიტანეს, რომელზეც სათამაშოების ნაცვლად შალვა თადუმაძის, გიორგი მიქაუტაძის და უზენაესის სასმართლოს კანდიდატების ფოტოებია. მათი თქმით, ისინი დღეს ბიძინა ივანიშვილის სათამაშოები არიან.

"ეს ადამიანები წინა ხელისუფლების დროსაც და ახლაც სათამაშოები არიან. ვისიც იქნება ძალაუფლება, იმასთან იქნებიან. ეს პერფორმანსიც მშვიდობიანი გამოხატვაა იმისა, რა ფორმაშიც სასამართლო სისტემა ყავს ივანიშვის უზურპირებული", — განუცხადა On.ge-ს გაბედეს აქტივისტმა, ბექა ნათელაშვილმა.

ფოტო: თამუნა გეგიძე / On.ge

ფოტო: თამუნა გეგიძრ / On.ge

დღეს, 12 დეკემბერს, იურიდიულ საკითხთა კომიტეტმა უვადოდ დასამტკიცებელი 14 მოსამართლის სიას რეკომენდაცია გაუწია. სიას კომიტეტის 8 წევრის მხარდაჭერა ჰქონდა. ახლა უკვე პლენარულ სხდომაზე კენჭისყრაა დარჩენილი. ამ სიის დამტკიცებას ეწინააღმდეგება საპარლამენტო ოპოზიცია, დამოუკიდებელი დეპუტატები და იუსტიციის უმაღლესი საბჭოს არამოსამართლე წევრები.

სხდომაზე შესვენების გამოცხადების შემდეგ, მანდატურის სამსახურმა ჟურნალისტები ძალის გამოყენებით გაიყვანა და მათ მოვალეობის შესრულების შესაძლებლობა არ ეძლეოდათ.

სიისთვის კენჭისყრას ეწინააღმდეგებოდნენ საპარლამენტო ოპოზიცია და დამოუკიდებელი დეპუტატები. მათი თქმით პროცესი არალეგიტიმურია. ეკა ბესელია ანრი ოხანაშვილს უზენაესის მოსამართლეების საკითხის განხილვის უფლებას არ აძლევდა. ბესელია ამბობს, რომ არასასესიო კვირაში მოსამართლეთა კანდიდატების საკითხის განხილვა, პარლამენტის რეგლამენტის დარღვევაა.