ეკონომიკის მინისტრის, ნათია თურნავას აზრით, ბიძინა ივანიშვილმა ასწლოვანი ხეები გადარგვით გადაარჩინა. მისივე თქმით, ივანიშვილი გადარგული ხეებით ყველასათვის ხელმისაწვდომ "უნიკალურ" პარკს აშენებს. თურნავა გამოეხმაურა ქართული ოცნების თავმჯდომარის ინტერვიუს, რომელიც მან გამოცემა ველურ ბუნებას მისცა.

"ზოგადად, ბევრი ხე არის მოუვლელი. ამ შემთხვევაში ძალიან კარგი რამ კეთდება, რომელიც ყველასთვის ხელმისაწვდომი იქნება. ეს ცალსახად ასეა", — განაცხადა თურნავამ.

როგორც ივანიშვილი ინტერვიუში ამბობს, ხეების დარგვა მისი ჰობია და ასი ათასობით ხე აქვს დარგული, თუმცა მის ბუნებასთან დამოკიდებულაზე ხალხს არასწორ წარმოდგენებს უქმნიან.

"ყველაფერში ნეგატივის დანახვა და ხალხისთვის სიცრუის ტირაჟირება ამ ქვეყანაში უნდა დასრულდეს. სამწუხაროდ, ზოგიერთი მედიის წარმომადგენლები ვირტუალურ რეალობაში ამყოფებენ ჩვენ მოსახლეობას, რათა ყველა მოვლენა მხოლოდ ნეგატიური კუთხით შუქდებოდეს", — განაცხადა ივანიშილმა.

ეკონომიკის მინისტრის მსგავსად ფიქრობს ინფრასტრუქტურის მინისტრი მაია ცქიტიშვილიც. მისი აზრით, ივანიშვილმა გადარგვით ხეები გადაარჩინა.