პარლამენტის ყოფილი თავმჯდომარე, ირაკლი კობახიძე ამბობს, რომ ე.წ. გერმანული მოდელის პროექტი ვენეციის კომისიისთვის ვერ გაიგზავნება და ეს ღირსების საქმესთანაა დაკავშირებული. ამის შესახებ მან გადაცემა კვირის თემაში ისაუბრა.

"განტოლებები არსებობს მათემატიკაში ერთუცნობიანი და ორუცნობიანი. ეს არის ერთგვარი უუცნობო განტოლება. წარმოიდგინეთ, რომ ქართველი მათემატიკოსები შეიკრიბონ და ჰარვარდში გაგზავნონ უუცნობო განტოლება ამოსახსნელად. ეს ხომ იქნება ღირსების თემა საზოგადოებისთვის და ქართველი მათემატიკოსებისთვის?", — განაცხადა კობახიძემ.

გარდა ამისა, ყოფილმა თავმჯდომარემ აღნიშნა, რომ 30 ნოემბერს ოპოზიციასთან შეხვედრისას განიმარტა თუ რატომ ვერ გაეგზავნებოდა ის ვენეციის კომისიას და არგუმენტები ხელისუფლების მხრიდან არ გაჟღერებულა:

"ჩვენ არ გვაქვს უფლება ვისაუბროთ იმაზე, ვინ რა თქვა, ანუ ეს იყო შეთანხმება შეხვედრის წინ. იქ ითქვა, რომ ეს ვენეციის კომისიაში ვერ გაიგზავნება და ითქვა რატომ ვერ გაიგზავნება და ამ არგუმენტის ავტორი არ იყო ხელისუფლების წარმომადგენელი".

გადაცემის წამყვანმა იკითხა, ეს არგუმენტები ოპოზიციის მხრიდან ხომ არ გაჟღერებულა, რაზეც კობახიძემ უპასუხა, რომ არა.

ოპოზიციისა და არასამთავრობო ორგანიზაციების ნაწილი ამტკიცებენ, რომ ე.წ. გერმანული მოდელის მოდიფიცირებული, ქართული ვარიანტი კონსტიტუციურია და მის მისაღებად საკონსტიტუციო ცვლილება საჭირო არაა. ისინი ითხოვენ, რომ პროექტის კონსტიტუციურობის შესაფასებლად მთავრობამ დოკუმენტი ვენეციის კომისიას გადაუგზავნოს, თუმცა ეს უკანასკნელი უარზეა.

გუშინ, 30 ნოემბერს სასტუმრო ბილტმორში დიპლომატიური კორპუსის მონაწილეობით ოპოზიციისა და ქართულ ოცნების შეხვედრა გაიმართა. ოპოზიციის მხრიდან შეხვედრას მხოლოდ საპარლამენტო ოპოზიციის წარმომადგენლები; ასევე, პარლამენტის ყოფილი თავმჯდომარეები, დავით უსუფაშვილი, ნინო ბურჯანაძე, აკაკი ასათიანი და ირაკლი კობახიძე ესწრებოდნენ. მმართველმა გუნდმა სამოქალაქო მოძრაობა შეხვედრაზე არ მიიწვია.

დიპლომატიური კორპუსის ჩართულობისა და საერთო შეხვედრის მიუხედავად, მმართველი გუნდი ოპოზიციას ე.წ. გერმანულ მოდელზე მაინც არ დათანხმდა.

იუსტიციის მინისტრის, თეა წულუკიანის თქმით, მმართველი გუნდი ურყევ პოზიციაზე დარჩა, რომ ე.წ. გერმანული მოდელი არაკონსტიტუციურია. მისივე თქმით, ეს თემა დაიხურა. ენმ-ს ლიდერი გრიგოლ ვაშაძე კი აცხადებს, რომ შეხვედრაზე ვერაფერზე შეთანხმდნენ იმის გარდა, რომ ამ ფორმატში დიალოგი გააგრძელონ.

ნოემბრის მოვლენები — მოკლედ

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.