BBC-ის ცნობით, ალეპოში "ჰუმანიტარული პაუზა" მოქმედებს, მშვიდობიანი მოქალაქეები საბრძოლო მოქმედებების ზონას ტოვებენ.

ცალმხრივი ზავი, რომელიც რუსეთმა გამოაცხადა, თბილისის დროით 20:00 საათამდე გაგრძელდება.

ადგილობრივ მოსახლეობას ქალაქის დატოვება რვა უსაფრთხო დერეფნით შეეძლება. პოზიციების დათმობაზე კი ამბოხებულები კვლავ უარს ამბობენ.

სირიისა და რუსეთის საჰაერო დარტყმები ალეპოზე სამშაბათს შეჩერდა. გასულ თვეში, სირიის სამთავრობო ძალებმა აღმოსავლეთ მონაკვეთი ალყაში მოაქციეს და რუსეთის მხარდაჭრით იერიშით შეუტიეს.

დასავლელი ლიდერების განცხადებით, რუსეთისა და სირიის თავდასხმა ალეპოზე სამხედრო დანაშაულად უნდა ჩაითვალოს.