საქართველოს ექსპრეზიდენტი, მიხეილ სააკაშვილი ახალ ვიდეომიმართვას ავრცელებს, რომელშიც ამბობს, რომ ბიძინა ივანიშვილის მმართველობა უკვე სუსტდება და საბოლოო ჯამში ენმ-ს გამარჯვების დრო მოდის:

"წინასაარჩევნო გამოსვლებში არასდროს მითქვამს, რომ არჩევნების პირველი ტურის დასრულებამდე ჩამოვიდოდი საქართველოში. საქმე იმაშია, რომ პირველი ტურის დასრულებამდე თუ ჩამოვიდოდი, იგივე ის ხალხი, ვინც მიკიჟინებს, რომ რატომ არ ჩამოვედი, გამომაცხადებდა პროვოკატორად და ივანიშვილს მიეცემოდა საფუძველი დავედანაშაულებინე მე პირადად და ჩვენი მომხრეები სამოქალაქო დაპირისპირების ინსპირირებაში.

ჩვენი პოზიცია იყო ძალიან ნათელი, ჩვენ ვაპირებდით პირველ ტურში გამარჯვებას, შემდეგ უკვე მეორე ტურისთვის ჩამოსვლას და ასევე არჩევნების დაცვაში მონაწილეობის მიღებას. მაგრამ მოხდა ის, რაც მოხდა: პირველი ტურის უპრეცედენტო მასშტაბის მანიპულაციები და გაყალბება. და რეაგირება ამაზე, როგორი უნდა მოხდეს, ეს არის ადგილზე მყოფი ლიდერების და აქტივისტების გადასაწყვეტი, რადგან ისინი უკეთ ხედავენ. ერთი რამ ჩემთვის ნათელია, ენმ-მ გაყალბებებისა და მანიპულაციების გათვალისწინებით, 600 ათასზე მეტი ხმა მიიღო. ეს ძალიან ბევრია ამ რეპრესიების და ზეწოლის პირობებში.

ხალხმა გაიგო, რომ ივანიშვილმა დიდი მანიპულაციები და გაყალბება ჩაიდინა. ეს პრაქტიკულად ყველამ იცის საქართველოში. არის შეუქცევადი პროცესი რუსი ოლიგარქის მმართველობის დასუსტების, მიუხედავად იმისა, ვინ რას ფიქრობს და საბოლოო ჯამში ჩვენ გამარჯვებამდე მიგვიყვანს. ახლა მნიშვნელოვანია ერთიანობა, მნიშვნელოვანია საბრძოლო განწყობა, მნიშვნელოვანია არშეპუება ამ აფერასთან, გაყალბებასთან, მანიპულაციებთან და ზეწოლასთან. ვიცი რომ ეს რთულია, მაგრამ საბოლოო ჯამში ყველაფერი გამოგვივა".