საზოგადოებრივი მოძრაობა ლელო, შენების მოძრობა და ახალი მემარჯვენეები ახალ საკონსულტაციო პლატფორმას ქმნიან. ამის შესახებ მამუკა ხაზარაძემ, დავით უსუფაშვილმა და ფიქრია ჩიხრაძემ პრესკონფერენციაზე განაცხადეს.

როგორც ახალი მემარჯვენეების ლიდერმა, ფიქრია ჩიხრაძემ განაცხადა, მათი გაერთიანება ქვეყნის მიმდინარე მოვლენებმა გამოიწვია:

"ჩვენ გამოვხატავთ მოსახლეობის დიდ ნაწილის ინტერესს, რომელიც უკიდურესად კრიტიკულად არის განწყობილი არსებული აწმყოს მიმართ და წარსულის დაბრუნებაც აშინებს. ეს იქნება თანასწორუფლებიანი პარტნიორების მიერ პარიტეტულ საწყისებზე დაფუძნებული პლატფორმა, რომელიც დაამარცხებს ორპოლუსიან სისტემას, ისარგებლებს საზოგადოების ნდობით და ააშენებს ძლიერ დემოკრატიულ ქვეყანას".

შენების მოძრაობის ლიდერმა, დავით უსუფაშვილმა კი აღნიშნა, რომ ისინი კონსულტაციებს ერთმანეთთან გაივლიან არამხოლოდ პროპორციულ საარჩევნო სისტემასთან, არამედ სამომავლო ნაბიჯებთან დაკავშირებითაც.

"ჩვენ გვაერთიანებს ამ შემთხვევაში რწმენა იმისა, რომ ქვეყანას სჭირდება პროპორციული არჩევნები და თუ პროპორციული არჩევნები არ იქნება, ჩვენ მზად უნდა ვიყოთ ნებისმიერი არჩევნებისთვის ნებისმიერ დროს", — განაცხადა უსუფაშვილმა.

ლელოს ერთ-ერთი ლიდერი, ბადრი ჯაფარიძის თქმით, მათი გაერთიანება გააგრძელებს გაერთიანებულ ოპოზიციასთან თანამშრომლობას:

"28 ორგანიზაციას, რომელიც არის ოპოზიციურ ერთობაში და მხარს უჭერს პროპორციულ სისტემას, თითოეულ მათგანს ერთმანეთის მიმართ სხვადასხვა დამოკიდებულება აქვს. ჩვენ უფრო მჭიდრო კოორდინაციის რეჟიმში შევდივართ, რომ სხვა თემებზეც ვიმსჯელოთ. ჩვენ იმ ერთობაში გვაქვს პროპორციული სისტემით არჩევნების ჩატარების მოთხოვნა, თორემ იქ სრულიად განსხვავებული საგარეო ორიენტაციის, იდეოლოგიის პარტიები. ჩვენ მათთან გვაერთიანებს მხოლოდ საარჩევნო სისტემის მოთხოვნა".

პროპორციული სისტემის კანონპროექტის ჩაგდების შემდეგ სამოქალაქო სექტორმა და ოპოზიციურმა პარტიებმა ერთობლივად შესთავაზეს ხელისუფლებას ე.წ. გერმანულ მოდელზე გადასვლა. ვინაიდან კანონპროექტის ჩაგდების მიზეზად მაჟორიტარი დეპუტატების უკმაყოფილება დასახელდა, პროტესტის მონაწილეებმა განაცხადეს, რომ ეს მოდელი მათ პარლამენტში მოხვედრასაც ითვალისწინებდა. აღნიშნული პროექტის ერთ-ერთი ინიციატორი და მხარდამჭერი დავით უსუფაშვილია.

კერძოდ, მოდელის მიხედვით, პარლამენტში ადგილები არჩევნებზე მიღებული ხმების შესაბამისად განაწილდება. მისი საშუალებით, გამარჯვებული მაჟორიტარები იღებენ მანდატებს და შემდგომ მათ პარტიული სიიდან ემატებათ იმდენი დეპუტატი, რამდენიც მათ პროპორციის შესაბამისად ეკუთვნით.

მმართველი გუნდი შეთავაზებას არ დათანხმდა. ქართული ოცნების გენერალური მდივანი კახა კალაძე აცხადებდა, რომ თემა დახურულია და ისინი სხვა ფორმატზე აღარ იმსჯელებენ.