პარლამენტის პირველი ვიცე-სპიკერის, გია ვოლსკის თქმით, აქციის მონაწილეები "რაოდენობის მიუხედვად იმდენად რადიკალურები და ხეპრეები" არიან, რომ ხელს უშლიან პარლამენტში საკითხების განხილვას.

"სამწუხაროა, მაგრამ საკმაოდ დიდია ხალხის რაოდენობა, ვინც აგრესიულად არის განწყობილი, მათ შორის ჩვენც გვიკავშირდებიან. კატეგორიულად არ უნდა იქნეს დაშვებული ის, რომ რაღაც დაძაბულობა, პარტიებს შორის ურთიერთობა საზოგადოებაზე გადავიდეს. რას იტყვიან ბოქლომები რა მნიშვნელობა აქვს, არ ეხსომება ხვალე არავის, თუ არ გავაკეთებთ ჩვენ ჩვენს საქმეს, ეს ყველას ძალიან კარგად მოაგონდება 2020 წელს, პასუხს მოგვთხოვს ხალხი", — თქვა გია ვოლსკიმ რუსთავი 2-თან საუბრისას.

დღეს, 29 ნოემბერს პარლამენტთან აქცია განახლდა, თუმცა, ქართული ოცნების დეპუტატები შენობაში მანამდე შევიდნენ, სანამ პიკეტი დაიწყებოდა. მოგვიანებით, აქციის მონაწილეებმა პარლამენტის ეროვნულ ბიბლიოთეკასთან გადაინაცვლეს. მათთვის ცნობილი გახდა, რომ თეა წულუკიანი იქ შეხვედრაზე მიდიოდა. მათი თქმით, ყველგან და ყოველთვის შეუქმნიან დისკომფორტს ქართული ოცნების წევრებს. ბიბლიოთეკასთან პოლიციაა მობილიზებული.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.