უკვე გეცოდინებათ, რომ CARU პირველი კომპანიაა საქართველოში, რომელმაც ძაღლი დაასაქმა. ბიგლუ ბიგლის ჯიშის ძაღლია და ის სულ რაღაც 10 თვისაა.

ფოტო: CARU • ქარუ

ძაღლი კომპანიის დამფუძნებელ ნიკას აჩუქეს, რომელიც პატარა ბიგლუს სახლში მარტო არასდროს ტოვებდა და სამსახურშიც დაჰყავდა. მალე ბიგლუ CARU-ს ოფიციალური თანამშრომელი გახდა და თანამშრომლების განწყობაზე ზრუნვის დეპარტამენტი ჩაიბარა, თუმცა კორპორატიული ურთიერთობები ყოველთვის არაა დრამისგან დაცლილი.

ახალბედა თანამშრომელს პატარა შეცდომა მოუვიდა. მან ფეისბუქზე ნაკუწებად ქცეული წიგნის სურათი გამოაქვეყნა, აღწერით:

"ეს წიგნი ნიკას დაიჭერდა ხოლმე და საათობით არ უშვებდა. ახლა ნიკა თავისუფალია, რომ მოვა სიხარულისგან იხტუნებს".

თუმცა, ყველაფერი პირიქით მოხდა. ბიგლუს არ დაუფასდა თავისი ადამიანის "გათავისუფლება", წიგნის გაფუჭების გამო კი პატრონმა ის ერთი დღით სახლში დატოვა.

ბიგლუმ ეს მოპყრობა ვერ აიტანა და სოციალურ ქსელში პროტესტი დაიწყო:

ამ ყველაფრის გარდა ცხოველების მონიტორინგის სააგენტოშიც კი უჩივლა!

ბიგლუს საბოლოო ნაბიჯი ფეისბუქზე ივენთის შექმნა იყო, მოწოდებით წაიყვანოს ნიკამ ბიგლუ სამსახურში. 200-ზე მეტმა ადამიანმა მოითხოვა, რომ ნიკას დაევიწყებინა წიგნის დახევის უსიამოვნო შემთხვევა და მომდევნო დღეს აუცილებლად წაეყვანა ბიგლუ სამსახურში.

საბედნიეროდ, სამსახურის პიკეტირება და სირცხვილის დერეფნები საჭირო არ გამხდარა: პროტესტი წარმატებით დასრულდა! მეორე დღეს ბიგლუ ნიკასთან ერთად მიბრძანდა სამსახურში.

ბიგლუს ფეისბუქზე საკუთარი გვერდიც აქვს, სადაც აქტიურად პოსტავს თავის პატრონზე, თანამშრომლებსა და ოფისის ამბებზე.

ბიგლუ ძველებურად აგრძელებს მუშაობას და არამხოლოდ თანამშრომლების, არამედ ჩვენი მკითხველების განწყობის ამაღლებასა და გამხიარულებასაც ახერხებს.