შინაგან საქმეთა მინისტრის, ვახტანგ გომელაურის განცხადებით, საჭიროების შემთხვევაში პარლამენტის პიკეტირებას ყოველ ჯერზე დაშლიან.

"საჭირო თუ იქნება ორჯერ და ასჯერ იქნება... რა ვქნათ, გადავკეტოთ მთელი ქალაქი? გეკითხებით, გადავკეტოთ მთელი ქალაქი? ცეცხლები დავანთოთ?" — უთხრა მან ჟურნალისტებს მთავრობის სხდომის დაწყების წინ.

კითხვაზე, ახლა თუ ხედავს პარლამენტის მიმდებარე ქუჩების გადაკეტვის აუცილებლობას, გომელაური პასუხობს, რომ რასაც ხედავ იმას აკეთებს:

"არ ვხედავ და ტყუილად გამოვიყვანე? მე ვარ შსს მინისტრი ხო? ვინ გამოიყვანდა? ჯანდაცვის მინისტრი ხო არ გამოიყვანდა. ვხედავ საჭიროებას და მაგიტომ გამომყავს".

როგორც მინისტრი ამბობს, უწყება აქვს რესურსი, რომ მსგავს რეჟიმში მუშაობა გააგრძელოს. მისივე თქმით, სანამ საჭირო იქნება პოლიცია გარეთ იდგება:

"დისკომფორტი როგორ არ არის. ოთხი დღეა დილიდან გარეთ ვდგავართ. მოქალაქეებისთვის [არის დისკომფორტი] პირველ რიგში, პოლიციელები არიან ცოდოები. და ჩვენ ვართ ცოდოები, ყველა მოქალაქე, რომელიც აქ ცხოვრობს, წუხდება".

რაც შეეხება პროპორციული საარჩევნო სისტემის კანონპროექტის ჩაგდებაზე მის პოზიციას, გომელაურმა უპასუხა:

"აი, ველოდებით და თუ არ შეასრულა მთავრობამ, მთელი პოლიცია გავიფიცებით. რა პოზიცია უნდა მქონდეს? ველოდებით, რა თქმა უდნა, თუმცა ჩავარდა. მე რა პოზიცია უნდა მქონდეს. უნდა გავიფიცო?"

მისივე თქმით, დიალოგმა კაბინეტებში უნდა გადაინაცვლოს და ოპოზიციამ უმრავლესობის წევრებთან მოლაპარაკებები უნდა დაიწყოს.

დილიდან საკანონმდებლო ორგანოს პიკეტირება იგეგმებოდა, თუმცა პოლიცია ოპოზიციის წევრებს მომზადებული დახვდა. პარლამენტის შენობის ყველა შესასვლელთან პოლიცია მობილიზებულია. საკანონმდებლო ორგანოსთან მისასვლელი ყველა გზა რკინის ჯებირებით არის გადაკეტილი.

პარლამენტის პიკეტირება 26 ნოემბერს დაანონსდა. მოქალაქეები, რომლებიც ბიძინა ივანიშვილის დაპირების არშესრულებას აპროტესტებენ თითქმის 10 დღეა აქციას მართავენ. მათ უნდათ, რომ პროპორციულ სისტემაზე გადასვლის კანონპროექტის ჩამგდები მმართველი პარტიის წევრები პარლამენტში არ შეუშვან. პარლამენტის სხდომებს ბოიკოტის ნიშნად არ ესწრება ნაციონალური მოძრაობა, ევროპული საქართველო და სხვა დამოუკიდებელი დეპუტატები.