ქართული ოცნების თავმჯდომარე ბიძინა ივანიშვილი აღიარებს, რომ პროპორციული საარჩევნო სისტემის შესახებ მან საზოგადოებას დაპირისპირება მისცა. ამით ის ეწინააღმდეგება იუსტიციის მინისტრის, თეა წულუკიანის განცხადებას, რომელმაც აღნიშნა, რომ ივანიშვილს დაპირება არ გაუცია და ეს იდეა იყო.

"ამ შემთხვევაში ჩემგან არ იქნება სწორი გავიმეორო, რომ ეს ხელოვნური ხმაური, რამეთუ სწორედ ჩემგან გაკეთებული განცხადება არის საფუძველი დღევანდელი ხმაურისა, თანაც ქართული ოცნების უმრავლესობა ამას დაეთანხმა. ჩვენ გავაკეთეთ გარკვეული დაპირება, მაგრამ ეს იყო ცალმხრივი დაპირება...

ეს არ ყოფილა ხელშეკრულების მსგავსი, ეს იყო ჩვენგან კეთილი ნება იმ რთულ სიტუაციაში, რომელიც მოყვა 20 ივნისის მოვლენებს... რა თქმა უნდა, სამწუხაროა, რომ ჩვენი დაპირება ვერ შევასრულეთ", — განაცხადა ივანიშვილმა იმედის ეთერში.

წულუკიანმა 21 ნოემბერს იმედის ეთერში განაცხადა, რომ ეს იყო ივანიშვილის იდეა, რომელსაც ის მხარს არ უჭერდა.

"ეს იდეა წამოვიდა ბიძინა ივანიშვილისგან და მე მიკვირს ადამიანების, რომლებიც ივანიშვილზე არიან ნაწყენი, რომ ეს იდეა ვერ გავიდა იმიტომ, რომ გარკვეულმა ჯგუფმა ხმა არ მისცა და მიდის სპეკულაციები იმაზე, რომ ამის უკან ალბათ ბიძინა ივანიშვილი დგას, თორემ ამას ოქრიაშვილი როგორ გაბედავდა. მე ვარ მომსწრე, როდესაც ბატონმა ბიძინამ ეს იდეა თათბირზე გააჟღერა, დეპუტატები, რომლებმაც ხმა არ მისცეს, იგივე ხუნდაძე, ოქრიაშვილი ღიად დაუპირისპირდნენ და თქვეს, რომ ეს ჩვენ არ მოგვწონს. იქ იყო ცხარე კამათი. ასე რომ, ვისზე არიან განაწყენებულები არ მესმის. ეს იყო ბატონი ბიძინას მიერ შეთავაზებული იდეა და არა დაპირება".

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში ორჯერ პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.